Indian pitar, kum 20 zet bo tawh, social media-a video pakhata Pakistan-a hmuh chhuah chuan an rama haw hlan nghkhlel takin a awm mek.
Hamida Banu-i hian kum 2002 khan Dubai-a chaw chhum hna thawk tura an tiamna zuiin a chhuak a; mahse, bum niin Pakistan-ah hruai luh a ni ta zawk niin a insawi.
Mumbai-a a chhungte chuan kum 20 zet an zawng tawh a, a tawpah mipa pahnih, Indian leh Pakistani pakhat hmangin an inbe thei ta a ni.
Inthenawm ram pahnihte hi ram inhal tak niin khawi lam mi ve ve tan pawh inkalpawh a harsa hle a. Banu-i phei hi chuan a rama haw leh turin pawisa a nei lo va, a kal dan tur pawh a hre lo a ni.
Kum tam tak chhung a tu leh fate hmu leh tura haw erawh a tum a. A tawpah, July thla khan social media activist Waliullah Maroof-a’n a kawm a, a video hi online-in a dah chhuak.
Indian chanchinbumi pakhat, Mumbai-a cheng, Khalfan Shaikh chuan social media-a amah zuitute hmuh turin a dah chhuak a, heta tang hian Banu-i chhungte hian an lo hmu ta a ni.
Mi pahnihin video hmanga Banu-i leh a fanu, Yasmin Shaikh te inbiak theihna tur an dapsak ta a ni.
“I dam em? Min hre thei em? Kum liam taah khan khawiah nge i awm?” tiin Yasmin-i hian a nu hi a zawt a ni.
“Khawiah nge ka awm leh engtin nge ka awm theih min zawt suh. Ka ngai lutuk cheu va, heta awm bak tih dan theih ka ngei lo a ni,” tiin Banu-i hian a chhang.
Maroof-a’n a kawmnaah hian Banu-i hian a pasal thih hnuah a fate pali chawm nan harsatna tawk lovin Doha, Qatar, Dubai leh Saudi Arabia-ah chaw chhumin a awm thin tih a sawi.
Kum 2002 khan hmeichhe pakhatin Dubai-a thawhna hmuhsak theia insawiin Rs. 20,000 a dil bawk tih a sawi.
Banu-in video-a a sawi dan chuan Dubai-ah hruai lovin Pakistan-a Hyderabad-ah hruai a ni ta zawk a, thla thum zet ina khung beh niin a insawi bawk.
Pakistan-a a awm chhung hian Karachi-a mi pakhat nen inneiin Covid-19 vangin a thihsan zui a, a fahrawn nen an cheng ta mek tih a sawi.
Yasmin-i chuan a nu hi tun hmaa ram danga a awm chuan an inbe fo thin a; mahse, kum 2002-a a chhuah hnuah erawh a phone ngai ta lo tih sawiin a hnuah a betu agent an bepawp ta tih a sawi.
“Ani chuan a that thu leh biak an phal loh thu a sawi a. A hnua kan zawh leh dawn chuan a lo awm tawh lo a ni,” a ti.
Maroof-a hi Karachi-a mosque pakhata imam a ni a, kum 15 kal ta velah a vawi khat nan Banu-i hi hmuin an in bulah dawrte a hawng niin a sawi.
“Naupang kan nih lai atangin ka hmu a, hlim loh hmel takin a awm thin,” a ti.
Maroof-a hian a social media account hmangin Bangladesh atanga ruk bote puiin an haw theihna a dap thin a ni.
Banu-i a kawmnaah hian Mumbai-a an chenna leh a fate hming pawh a sawi a ni.
Shaikh-a’n video a thehdarh hnuah hian Yasmin-i fapa, Aman chuan a lo hmu a. Kum 18 mi hian a pi hi vawi khat mah a la hmu lo va, a nu a hmuhtir chuan Yasmin-i chuan chiang takin a nu chu a lo hre thei ta a ni.
Maroof-a chuan Pakistana Indian High Commission hotute biain Banu-i thil tawnte thehluh a ni tawh a, India-a a haw leh dan tur dap mek a ni a, engchena rei nge hun a awh dawn erawh hriat a ni lo.
Banu-i chuan a chhungte hmuh leh hlan a nghakhlel hle tawh a, India-a a fate pawhin kum 20 an lo nghah tawh chu an nghakhlel hle tih an sawi.