Agriculture Minister C. Lalrinsanga’n Mualkhang Zau Sihfa, Saitual district ami chu nimin khan a tlawh a. Agriculture department hmalakna leh thlai thar hralh dan te enpuiin, Aizawl bazar-a hralh tur thlai thar thahnem tak a vailiam bawk.
C. Lalrinsanga chuan Sihfa khuaa kuthnathawktute hmalakna chu ropui a tih thu sawiin, ram economy dinchhuahna bul chu kuthnathawktute an nih thu a sawi a. "Khawvel ram ropui zawk Europe ramte hi mihausa kalkhawmte din ni lovin, kuthnathawktu ten an tih bek bekna atanga tun dinhmun hi thleng thei an ni" a ti.
Agriculture Minister chuan Sihfa khuaa kuthnathawktute tana sorkarin hmachhawp a neih hrang hrangte pawh sawilangin Th- lai thar dahkhawmna tur Collection Centre sak sak an nih tur thu a sawi a, Zau panna link road chu tun dinhmunah a vaia tih har deuh rih mahse hna hmasa atan engemawchen a thui cement chhun a nih tur thu a sawi bakah kuthnathawktu ten an sum thawhchhuahte awlsam zawka an dah thatna tur kuthnathawktute pual bik bank primary agriculture credit society (PACS) Sihfa khuaah kalpui theih dan kawng dappui a tum thu a sawi bawk.
A taka thawktu ten an thar te man tlawm tea an dehral laia, a khar chhawngtu ten a let deuhthaw hlepa an hralhchhuak leh thin chu veiawm a tih thu Agriculture Minister chuan a sawi a. Kuthnathawktu ten an thawh hah phu-a an chanvo dik tak an chan theiha, man man zawka an thlai tharte an hralh theih nan sorkarin ngaihtuahna a seng tih sawiin, vegitable supply chain a ngaihpawimawh thu leh a bawhzui zel tur thu a sawi.
Sihfa khuain khawpuia an thlai thar te man man zawka an hralh theihna turin Aizawl hmun laili, tuna Agriculture building hlui hmun awlah kawng dappui a tum tih Agriculture Minister chuan a sawi a. Kuthnathawktu ten hlawk zawk leh awlsam zawka Buh leh thlai an thar theih nan sorkarin ngaihtuahna thar a seng tih sawiin, Neihbawia Agriculture farm-ah rannung microbes behchhana siam leitha biofertilisers siamna OP-12 Bio Fertiliser Production Unit pawh SEDP hmanga din mek a nih thu a sawi.
He leitha siamna tur hi loneitute leh kuthnathawktute tana chhenfakawm tak a ni dawn tih C Lalrinsanga chuan sawiin, lei hanna soil fertility tlahniam mek a siamthat leh theih a beisei thu a sawi a. Thlai thar kawngah nasa takin bio fertiliser-in kuthnathawktute a puih a rin thu leh hemi kal theih a nih chuan Mizoramah Agriculture revival a thlen a beisei thu a sawi bawk.
Agriculture Minister C. Lalrinsanga chuan SEDP Vaimim chungchang pawh sawiin, Matric ton 5000 vel thar an beisei thu sawiin, Vaimim te chu ran chaw atan dehral dan kawng dap tumna a awm thu a sawi a. Serchhip district-ah Agriculture department bultumin hlawhtling takin ran chaw siam mek a ni tih sawiin, hemi atan hian FOCUS atangin a khawl lei a nih thu leh RKVY atangin a khawl dahna tur building sak a nih thu a sawi bawk a ni.