Supermodel Gigi Hadid chuan Twitter account a delete fel tawh a, inhuatna buzawl a ni ta, a ti.
Instagram kaltlangin micro-blogging lar Twitter a chhuahsan thu a puanna ah helai hmun hi hmun him a ni tawh lova, mitin tan hmun hlauhawm leh tihbaiawm a ni mek zel, tiin a sawi.
Elon Musk-a’n $Billion 44 zeta Twitter a leichhuah hnu ah chet lakna ah kum 27 mi Supermodel hian a chhuah rualin, twitter chu inhuatna buzawlah a chang mek, tiin a umzui.
“Hun rei tak atang tawh khan a ni a, a bik takin hruaitu thar hnu ah a ni lehzual. Inhuatna buzawl lianpui ah a chang chho mek zel a, ka tel ve duhna hmun a ni ta hauh lo mai,” tiin a chhuahsan chhan a tarlang.
A chhuahsan tak vanga hrilhhai taka awm tur a fan te a ngaihtuah hle a, hun rei tak chhung he platform kaltlanga inzawmna leh inlaichinna tha tak an neih chungchangah lawmthu a sawi rualin, account delete chungchangah pawh ngaihdam a dil nghal.
“Mitin tana hmun him a ni tiin ka sawi ngam lova, thil tha lo aia thil tha thlenna hmun tih pawhin ka sawi ngam lo bawk,” tiin Gigi hian tawp a khar.