ZPM Working President K Sapdanga chuan, “Tuna kan awm dan hi, ram dan hian zawm a hlawh lo a, dan lo ang zelin kan kal,” a ti.
Nimina Kolasib Diakkawn YMA Hall-ah ZPM Kolasib Block buatsaihin Block Conference ruala political training neih a ni. He hunaa thu sawitu K Sapdanga hian, Laloo-a chuan sorkar project awmsa atangin hlekruk dan dawng a dap laiin, Mizoramah chuan hleprukna tur remchang atan project siam tur dap a ni thung tih sawiin, “Laloo-a hial pawh kan awt tan ta. Tunah chuan hlepruk tur takngial pawh sum kan nei tawh si lo a, a theihna hmun apiang ami pung awmin kan puk ta ngat ngat a, India ram state zinga puk huai ber kan ni,” a ti.
K Sapdanga hian, tun MLA ni mekte lakah hian a tirah khan mipui beiseina sang hle mah se, chan loh khanah a chhuak tih ang maiin board phuahchawpin hna bul tan niin, mitsiaia duhsak zawngte hna semna atan tih niawm tak an nih thu a sawi a. “Tuna kan awm dan hi chu ram dan hian zawm a hlawh lo a, dan lo ang zelin kan kal,” tiin, ZPM hi mipuite’n hnathawh kawr an hak tir anih chuan dan a zalen tawh dawn thu leh chhungte sum hawha eiruk chulmam a rem tawh dawn lo niin a sawi.
Tuna Mizoramin a mamawh hmanhmawh thlak ta ber chu chief minister mumal neih a nih thu sawiin K Sapdanga hian a sawi a. Sum indaih loh vanga harsatna te sutkian dan awmze nei ber chu inremchem leh sum hmanna tul lo ‘cut’ ngam a nih thu leh mipui chhiah chawi atanga rulh tur sum puk huai viau hi inrelbawl dan tha lo a nih thu a sawi.
ZPM leader Lalduhoma chuan, “Kan ram tichhetu pakhat chu min bumtu kan la zui zel a, an tana thahnemngai taka kan la campaign hi a ni,” tiin, hruaitu tha lo zui tlat te hian ramin a tuar tih a sawi a. Sorkar tha siam turin Mizoram hi a insingsa mup mup a, inthlan hi political party ai mahnin neutral hian an nghakhlel tawh zawk niin a sawi bawk.
Kolasib ZPM Block President R Lalruaia kaihhruai inkhawmah hian ZPM leader Lalduhoma’n an party-ah mi thar a lawm luh bakah, ZPM PAC Member TBC Lalvenchhunga leh AMC Councillor Baryl Vanneihsangi te’n thu an sawi ve bawk.