World Cup : Ecuador in a thlengtu hneh nghal

A thlengtu ram rinkai lo zawk an ni sa chungin tlawm in bul an tan a. Ecuador lakah chesualin 2022 FIFA World Cup a inkhel hmasa berah 2-0 in an chak lo.

Pathianni zana Al Bayt Stadium a inkhelah Felix Sanchez-a pawlte hi tunhnai thla ruk chhung training camp uluk taka neiin an inbuatsaih thin. Tournament thlen hlawhtlin chauh an tum lova, an team pawhin hma an sawn a ni tih lantir an tum.

Mahse tactics leh thildang an inzirna zawng zawng a takah an lantir thei lova. Group A inkhelah an chesual nasa.

A hautak dawn

Africa Cup of Nations champion Senegal leh vawi thum World Cup final khel tawh Netherlands te nen group khatah an awm a. Qatar tana point hmuhna chance tha ber tura ngaih a ni.

Mahse Ecuador in inkhel an thunun a, a tir atanga a tawp thlengin chungnung zawkah an tang.

Ecuador forward tawnhriat ngah Enner Valencia in goal hmahruai a tauh luh chu video assistant referee hman hnuah offside avanga pawm loh a ni a. Mahse goal an nghak rei lo.

Qatar goalkeeper Saad Al Sheeb a chesual nasa a. Valencia hi ti tlu in penalty a chawi a. Ecuador captain in goal-ah a chantir.

Halftime dawnah Valencia bawk a inlar a, penalty area chhunga ball an cross luh chu mawi takin a tauh lut.

Second half-ah pawh Ecuador in an khung belh teuh a, Romario Ibarra goal khung tur Al-Sheeb chuan a dansak a. Lehlamah Qatar hian Ecuador goal-ah chance chiang tak an nei miah lo.

Qatar in World Cup a thleng tur hi kum 12 kalta atang khan sawi a hlawh tawh a. Sum umna thil nia ngaihna avangin kawng hrang hrang a sawisel a hlawh.

A thlengtu ram erawh an phur a, khawvela inelna lian ber tia chhal han thlen kha an phur. A inbuatsaih nan pawh an ramin an Dollar tluklehdingawn 200 chuang an seng.

Asia champion hian Ecuador goalkeeper Hernan Galindez tan hna mumal tak vawikhat pawh an siamsak thei lova. Kum 2010 a South Africa hnua a thlengtu ram group stage pawh pel thei lo hmasa ber nih theihna an nei a. An la hmachhawn tur team pahnihte thlirin an nih a rinawm.

Hetihlai hian Ecuador tan chak a pawimawh a. Goal chhuah lova point thum an hmuh nghal avangin round of 16 beiseina an tan a inhawng zau sawt.

Leave a Reply

Your email address will not be published. Required fields are marked *

error: Content is protected !!