Sum harsatna sawi mam tuma thawh hi mipui zah lohna : MPCC

Mizoram Pradesh Congress Committee (MPCC) chuan nimin khan Aizawl Press Club-ah thu thar thehdarhtute an kawm a. He hun kaihruaitu Dr Lallianchhunga chuan finance minister pawh ni lo, MNF MLA leh an party hotu thenkhatte chuan Mizoramin sum leh pai harsatna a tawh mek sawi mam tumin thapui an thawh chu mipui zah lohna dik tak niin a sawi.

Congress thupuangtu, Dr Lallianchhunga chuan, “Ramin sum harsatna a tawk mek lai hian dinance changtu, Chief Minister Zoramthanga chu a ngawi tlat a. Puk belh zel tih mai loh chu siam that tum a hnekin kan dinhmun chhiatzia sawi chhuaktu apiangte chu MNF hruaituten tawngkam buluk tak takin an bei let dur dur reng zawk a ni,” a ti.

MNF MLA L Thangmawia’n, ‘MPCC-in Mizoram leiba Rs.cheng vbc 12,553.08-a pung anga an tar lan hi khawi atanga data an neih nge? Tui let hnuah Mizoram leiba hi Rs. vbc 12,553.08 a la tling ngai lo,’ tia sawi chu thil zahthlak tak a nih thu a sawi a. July 25, 2022-a finance department-in RTI an chhannaah chiang taka ziah lan a nih thu leh Mizoram budget bu, Annual Financial Statement 2022-2023 phek 24-naah en theihin a awm reng tih a sawi.

Dr Lallianchhunga chuan November 21, 2022-a Hnam Run inkhawma MNF Vice President Lalthlengliana’n, ‘Pu Zoramthanga tluka finance enkawl thiam Mizoramah an la awm lo,’ a tihte phei hi MNF-in mipui an tham loh thinzia tilang chiangtu nia sawiin, “Finance chungchanga Mizoram dinhmun chhiatzia en hian Pu Zoramthanga, finance minister hi fak hun a ni lo a, siam that duh tak tak tan chuan na taka sawisel hun a ni zawk. MNF sorkar hian Mizoram sum leh pai dinhmun siam that tuma hmalak mekna a nei lo a nih chuan sawi pial tumin hma la tawh suh se,” a ti.

Kum 2008-a Congress sorkar a pian khan sum dinhmun tha lo tak chu MNF sorkar lak atanga rochunin, term khatna (2008-13) chhung phei kha chuan RBI atangin Ways & Means hmangin sum a puk ve deuh reng a. Sum dinhmun tha lo hi sorkar lai tan mualphona anga ngaih theih ni mah se, khatih laia finance minister, Liansailova leh sorkar hotuten mipui lakah a lema insawi mam leh sum harsatna thup tum loin an sawi chhuak a, sum harsatna sutkian tumin hma an laknaah an hlawhtling tih a sawi.

Dr Lallianchhunga chuan Congress sorkar leh MNF sorkar hnuaia Mizoram sum leh pai dinhmun inthat hleih dan leh leiba pun dan hi finfiahna (evidence) a awm thlap tih sawiin, “Finance Minister Pu Zoramthanga hi Mizoram sum leh pai enkawl thiam a ni tih finfiahna budget document-ah hmuh tur a awm lo,” tia sawiin, Congress sorkar erawh Mizoram sum leh pai dinhmun siam thatu a ni tih finfiahna budget document-ah a awm tih a sawi bawk.

‘A chhelai siam thatu’ ni lo a, ‘a thalai tichhetu’ nih leh ‘a chhe lai sawi mam tumtu’ nih inhmeh bik riau sorkar an awm tih sawiin, “Congress party hi Pathian zarah ‘a chhelai siam thatu’ a lo ni tawh thin a, ni leh turin kan inbuatsaih mek. Mipuite tana nu leh pa nih tling tak, sorkar tha sorkar din kan tum,” tiin Congress thupuangtu hian a sawi a ni.

Leave a Reply

Your email address will not be published. Required fields are marked *

error: Content is protected !!