Corruption kan buan hneh dawn em?

  • MC Lalthianghlima

Corruption, corruption tih reng mai hi a hne awm a, sawi leh ngaihthlak pawh a herhawm fo thin, nimahsela tun dinhmuna kan rama thil buaipui ngai tak a nih tlat si avang hian, kan ning emaw ninglo emaw a sawi fo loh theih lova, kan sawi zêl pawh a la ngai dawn niin a lang.

Mizo Aw leh tawrhbawm chanchinbu, ni 17. January. 2017 (Thawhlehni) chhuak kha kan en lêt chuan, vawiina kan Chief Minister hian, khatih laia opposition an nih lai khan ni 16. January. 2017 a Mizo hnam rûn, kum 2017 atana hawn a nih ni khan kumthar thuchah a sawi kan lo chhiar a, hetiang hian a thusawi an rawn tar lang a nih kha. “MNF in sorkarna a lo siam tawh kum sawm chhung khan thil tih dik tawk loh e’ngemaw zât an nei tih a pawm thu sawiin, mipui hnenah ngaihdam a dîl a. MNF President chuan, MNF in sorkarna a siam leh a nih chuan Zoram thar danglam tak leh corruption do tak tak ngam kan siam ang a ti bawk” tiin, a sawi zel dan an rawn tar lan ah chuan “Ram rorelna fel leh thianghlim a awm theih nan corruption nasa takin kan do ang a, Chief Minister atanga a tê ber thlenga chhui theih tur dahin kan din ang. Corruption tihbo tumin beihpui kan thlak dawn a ni” …… “Pathian leh mipui zarah sorkarna chang leh thei ila, nasa takin ka danglamin ka chak zawk tawh ngei ang tih ka ring” tiin.

Tichuan, zoram mipuite chuan kum sawm chhûng tehmeuh kan lo hrawn tawh Congress party chu paihin, beiseina thar nen MNF party chu hneh takin kan sorkar tir ta a, kum 4 dawn lai MNF sorkar chuan min lo kaihruai dawn ta reng mai. Hemi hun chhung hian,kan ram (Mizoram) ah hian corruption kan tih mai, hlemhletna leh diklo taka sum tih chingpenna hian min kian san em le?. Corruption tih bo tuma, beihpui thlakna programme lian tak kan lo beisei kha, tihin a awm ta em le?. Nge nia, kian san a hnehin a pung tual tual zawk niin kan hre zawk?.

Tichuan, hmanni lawka Mizoram tlawmngai pâwl lian ber Central YMA rorel Thingsûlthliah khelmual (Pandal) a neih ah chuan, rorel palai 1452 tehmeuh kal khawm chuan “Eirûkna leh hlemhlêtna a reh theih nân CYMA in tun aia chak zâwkin hma la rawh se” tiin ro a rêl ta hial bawk.

CYMA rorêl thuchhuak kha, a thlamuan thlakin a ropui hle mai engtiangin nge eirukna leh hlemhlêtna a reh theih nân ke a pên dawn tih chu dingdihlipin kan thlir mêk a, hma kan la tak tak dawn a nih chuan kan zuam tâwk chin mai ni lo, thlasik khawvâwt tuar huama li thûk lam pana lên kan den ngei pawh beisei teh ang.

Tunah hian, Congress party chuan “That loh theih lohna bâwm” min kawhhmuh mêk bawk a, he that loh theih lohna bâwmah hian, diklo taka thil tih do leh corruption do-te chu an chângthlan lian berte zinga mi a ni bawk. Ni 28. September. 2022 Vanglaini chanchinbu ah chuan Mizoram Pradesh Mahila Congress Committee huaihawt Aizawl City block Mahila conference cum political training programme a hmanpuinaa MPCC President Pu Lalsâwta thusawi rawn tarlan niin “Pathian chakna âia sum chakna ringtute âi chuan, congress chu kan danglam ngam tur a ni” tiin.

Heng bâkah hian, chanchinbu hrang hrang leh T.V news thlengin, corruption do tur leh chumi ti reh tura an inbuatsaih nasat thute kan hre châmchi bawk. Sorkarna lo chang leh ta sela “That loh theih lohna bâwm” ah hian, corruption hi an up hlum thei ang em le? tih chu thuneihna (Sorkarna) an chan phawt loh chuan finfiah theih tak tak a ni rih bawk si lo.

October ni 14. 2022 (Zirtawpni) ah khân Z.P.M President Pu. Lalliansâwta chuan Aizawl press club ah, thu thar thehdarhtute a kawm a. “Sorkarna kan chang a nih chuan, kan danglam dawn” tiin thu a sawi bawk.(Vanglaini 15. October. 2022). An ni pawh hian, “Kalphung thar” an zuar mêka, chu kalphung tharah chuan, hlemhlêtna (Corruption) hi rêp châr an tum ruh hle niin a hriat, chutih rualin kan sawi tawh angin, sorkarna fawng an chelh hma chu an thusawite hi a taka finfiah theih tak tak erawh a la ni lo bawk.

Tichuan, an Chiefministerial candidate (ZPM leader) Pu. Lalduhoma chuan ni 28. October. 2022 ah Hrângturzo bial tlawha a zin kualnaah; Mizoram ei chhetu ber chu eirûkna a nih thu sawiin “Corruption hi thunun a ngai êm êm a, Pathian leh mipui zara kan sorkar chuan Lokayukta kan ti chak anga, chief minister thlenga chhui theiin kan siam dawn… … Kan sorkar chuan CBI kan ko lût dâwn a ni” a ti a (Vanglaini 29. October. 2022). A sawi zelna ah “Kan sorkar atanga ni 100 chhûngin kan ram hmêlhmang thlak kan tum a, mipui mimirte’n politician an thlîr dan hi thlak danglam theih kan inbeisei” a ti bawk.

Kan ram hruaitute leh political party leader-te thusawi leh CYMA rorêl thuchhuakte han thlir chuan, kan ramah hian “Corruption” hian hmun a chang lian hle a, min rûn mêk a ni tih hi, zêp leh phat theih a ni lo, tun huna kan nihna dik tak a ni tih a ti fiah hle. Chu corruption chu, dova tih rem kan duh tlang hle niin a hriat bawk, nimahsela kan dinhmun chu heti mai hi a la ni si a. Corruption do tura CYMA hnalaknate thlir zêl ila, ti takzeta ke kan pen pawh beisei ila. 2023 a sorkar thar lo piang tur (eng party pawh ni se) pawh thlir chung zêlin, he corruption kan tih teivet hi kan buan hneh dawn em? tih chu hunin a la rawn hril zêl ang chu.

Vote zawn nan leh Lal duhna avanga inzawrhna mai mai atân chuan “Corruption do” chang thlana neih hi kan phal hauh lova, thu hi tisa ah chang ngei se kan duh tawh a ni. Mipuiin fîr takin kan lo bûk ang a, corruption hi kan hnê tlang riau ni pawhin a langa, kan buan hneh êm ang chu maw!

Sorkar ngawr ngawr kan tinzawn theilo, kan ram dung leh vangah hian he corruption hian politics huang chauh ni lo, kan chet velna hrang hrangah hian min ti buai hle niin a lang a, heti renga kan kal chuan Rev. Chanchinmawia (R.I.P) in “Kan ramah hian, a diklo zawk an huai zawk” ti a a sawi kha, a takin kan tawng mêk a ng riau. Chuvangin corruption buan hneh ngei tura kan inbuatsaih a tul takmeuh meuh a ni e.

Leave a Reply

Your email address will not be published. Required fields are marked *

error: Content is protected !!