Lirnghing na takin Turkey khawthlang lam a sawi

Magnitude 5.9-a na lirnghingin Nilaini khan Turkey khawthlang lam, Duzce khaw bul a sawi.

Lirnghinna hmnn hi Turkey-a an khawpui lian ber, Istanbul atanga khawchhak lam km 210-a hla a ni.

Lirnghing hian na takin Istanbul leh an khawpui, Ankara pawh a sawi phak a. Mi 50 vel hliam tuar an awm tih thuneitute chuan an sawi.

A nghin tanna hi lei hnuai km 2 atanga 10 inkar vel niin an ring.

A nghinna lai velah hian power supply a khaihlak nghal a, mi pakhat chu an tukverh (balcony) atanga a zuan chhuahna lamah a inhliam.

A nghin hmasak atanga minute 20 velah magnitude 4.7-a nain a nghing nawn leh zui bawk.

Turkish Interior Minister Suleyman Soylu chuan broadcaster TRT Haber hnenah thil chhe liantham a awm loh hlauh thu a sawi a, ‘chhek in leh thil sak rinawm loh deuh chhia erawh a awm nual’ a ti.

Thuneitute chu power supply a mumal leh theih nan an thawk zui nghal mek.

Turkey-a disaster agency chuan Duzce-ah mi 37 inhliam an awm thu leh Istanbul-ah pakhat, Zonguldak-ah paruk leh Black Sea kama Sakarya-ah mi pakhat, chhimchhak lama Bolu-ah mi pakhat a inhliam thu an sawi.

Duzce-a thil awm dan thlalak thehdarhah chuan zanah mi tam tak pawnah an tlan chhuak a, thenkhat chu blanket-in an intuam a, intihlum nan khawlaiah mei an chhem hlawm.

Social media-ah security camera-in thla a lo lak fuh, lir a nghin laia thil thlen dante chu thehdarh a ni bawk.

Duzce court house chu in pariat chhe zingah a tel.

Duzce-a cheng pakhat, Fatma Colak chuan ‘thawm ring tak leh lirnghingin’ a mutui lai a tihharh thu AFP hnenah a hrilh.

“In atangin phili takin kan tlan chhuak a, pawnah mi tam tak an lo awm tawh,” a ti.

Duzce khua hi kum 1999 khan magnitude 7.9-a na lirnghingin na takin a lo sawi tawh a, mi 845 vel zet an thi.

He thil thlen hma thla rei vak lovah khawthlang lam km 100 vela hla, Izmit khawpui chu sawi bawkin hemi tum phei hi chuan mi 17,000 chuang an thi a, helai bawr vela in zawng zawng deuhthaw chu a chim.

Duzce-a in ding mek 80% vel hi kum 1999-a lirnghing an tawrh hnua an din thar leh kha a ni hlawm tih an mayor chuan tual chhung chanchinbute hnenah a sawi.

Leave a Reply

Your email address will not be published. Required fields are marked *

error: Content is protected !!