Aizawl: Sorkar laipui Ministry of Micro Small & Medium Enterprises (MSME)-in ram chhunga thil siam chhuahte quality tha zawk neih theihna atana scheme pakhat, Zero Effect Zero Defect (ZED) chu nimin khan Mizoramah hawn a ni a. He scheme chungchanga inhrilhfiahna hun hman nghal a ni bawk.
Mizoram sorkar hnuaia Commerce & Industries deptt nen-a tangkawpa hawnna inkhawm hi Aijal Club-ah neih a ni a. ZED hawnnaah hian Commerce & Indstries Joint Director R Laltanzuala’n hmanpuiin Mizoram Industries Owners Association (MIOA) hruaitute pawh an tel.
MIOA President F Rodingliana chuan thu sawiin Mizorama industry dintuten harsatna hrang hrang an tawh dante a sawi a. Mizoram chu India hmarchhak state kilkhawr, tlangram leh fur ruahtui tlak hun chhung rei tak a nih avangin tual chhunga industry dintuten hmun danga mite harsatna tawh lem loh an tawk nasa a, an thil siam man a to phah thin thu a sawi a. Sorkar laipui pawhin hei hi hriain hmarchhak state hi special category a pek tam bik a tul thu te, mahni kea ding turte tan pawh bank puihna an mamawh nasat avangin hemi kawngah hian sorkar leh bank lam pawhin sumdawnna bul tan turte tan an inhawn a, an thlawp that a tul thu a sawi.
ZED chungchang hrilhfiah a nih danin he scheme hi thil siamtuten environment tibuai chuang loa quality tha zawk neih theih nana thil an siamna tura ruahman a ni a. He scheme hnuaiah hian industry leh enterprise neitu a duh apiang tan inziah luh theih a ni a, inziah luhnaah pawh hian concession a awm nghal a ni.
He scheme hnuaia inziak lutte thil siamna atana an hmanrua quality a zirin label thum – gold, silver leh bronze a then thin a ni a. ZED certification nei chuan loan an lak dawnin a pung hniam zawka an lak theih bakah an lak theih zat a pung thei a. Thil siamna atana an hmanrua (raw material) chawkluhnaah rel-ah pawh ngaihhnathiamna tam tak awm bawk a ni.