MPCC president-in a hmunah PACS zirchiang

Aizawl: Thawhlehni khan MPCC President Lalsawta chuan Ratu khuaa Primary Agricultural Credit Societies (PACS) kalphung chi hrang hrang leh ram tana rotling bakah ram economy siam thatna atan te, a bik takin kuthnathawktute chawikanna tur atan a hman tlak reng em tihte kalchilhin a zir chiang.

PACS a zir chian chhan sawiin Lalsawta hian Mizoram economy siam tha turin ngaihtuahna an sen nasat thu a sawi a. “Kuthnathawktute chawi chhuah hi kan thil tum pawimawh tak a ni a. Mi retheite chawi chhuahna atana thil pawimawh hmasa nia kan hriat apiangah kan kal nghal dawn a. Chutiang chuan, PACS pawh hi kuthnathawktute chawi chhuahna atana thil pawimawh a ni tih kan hria a. Pathian leh mipuite zara kan sorkar a nih chuan tun aia tha zawk leh changtlung zawkin kalpui kan tum dawn a ni,” a ti.

MPCC thuchhuah danin Ratu LAMPS (PACS) hnuaiah hian account neitu mi 1,111 lai awmin share holder hi mi 411-in an nei a. NABARD-in lirthei leh aieng herna tur khawl pein electric pawhna atana sum senso a hautak deuh avangin tunah aieng herna khawl hi an la hmang thei lo a. Aieng herna tura thil tul dang zawng zawng erawh tihfel vek tawh a ni thung.

PACS hi tun dinhmunah India rama bank dang nen la inthlunzawm lo mah se, sorkar laipui hmalakna in All India-a bank dangte nena in link tura hmalak mek a ni. PACS hnuaia account neitute pawisa pek tling khawmin loan pek chhuah thin niin, motor loan te pawh Ratu PACS hnuai atanga pek chhuah a ni tawh a. Kuthnathawktuten loan an lak dawnin LSC dahkham tir an nih bakah mi thenkhatte erawh VC pass hmanga loan pek chhuah pawh an awm bawk.

Ratu LAMPS (PACS) hi kum 2013 a din a ni a, Joint Liabilities Group (JLB) hnuaiah central sorkar hnuai atangin kuthnathawktute tan loan an pe chhuak tawh a. Agriculture hnuaia loan interest hi 12% a nih bakah Self Help Group tan interest rate hi 10% niin mimal mamawhna ang chi-ah interest 15% in loan an pe chhuak thin bawk a ni.

Leave a Reply

Your email address will not be published. Required fields are marked *

error: Content is protected !!