MZU expert team-in Govt. Champhai College-a Subject affiliation endik hna an thawk

Mizoram University (MZU)-a expert team ten nimin khan Govt. Champhai College-ah Subject affiliation inspection an nei a; Department chan insemin – Dr. Zoramdinthara’n Mizo leh English department a endik a, Prof. Rokendro Singh-a’n Economics & Commerce department, Prof. Zaithanzauva’n Physics leh Bachelor of Computer Application department (BCA), Prof. Muthukumaran Chemistry leh Mathematics department, Prof. HT Lalremsanga’n Zoology leh Botany department a endik.

MZU Inspection team-te hmaah hian department hrang hr- ang ten an department dinhmunte an sawifiah a; Zirtirtu leh zirlai neih dante, lehkhabu leh laboratory hmanraw neih dante, result neih tawh dante leh zirlaiin zirna sang zawk an chhunzawm dan leh hna an hmuh dante bakah department hmasawnna leh thil pawimawh hrang hrangte an lo hrilh.

Inspection neih zawha Exit meeting-ah thil pawimawh hrang hrang sawiho zui nghalin, hemi hnu hian Faculty development programme on code of professional ethics chu College seminar hall-ah hman chhunzawm a ni a. Resource person Prof. Lalbiakdiki Hnamte, Director, College Development Council, MZU-in hun a hmang.

Sorkar thuchhuahin a tarlan danin Govt. Champhai College-ah hian Subject permanent affiliation neih tawh sa History, Geography, Education leh Political Science-te niin Subject dang 10 te chu temporary affiliation a la ni a. Permanent affiliation neih theih loh chhan lian ber pakhat chu zirtirtu nghet an tam tawk loh vang a nih thu an sawi.

Govt. Champhai College hi August ni 6, 1971 a din niin NAAC accredited B++ a ni mek a, Science, Commerce, Arts leh BCA zirna an kalpui mek a ni.

Leave a Reply

Your email address will not be published. Required fields are marked *

error: Content is protected !!