ZPM Working President K Sapdanga chuan ZPM anga inthlanpui vawi hnihna hmachhawn turin kalphung thar, mipui sorkar din turin an inbuatsaih mek niin a sawi.
Nimina ZPM chhung inkhawmah thu sawiin K Sapdanga hian kalphung, thar mipui sorkar din hi an thupui ber a ni tih sawiin, “ZPM anga inthlanpui vawi hnihna hmachhawn turin kan party pawh kan inbuatsaih mek a, a tum khatnaah kha chuan pawl ding thar kan nih avangin thil fel tawk lo tam tak a awm a, party pawhin hmasawn zelin kalphung thar mipui sorkar din turin vawiinah hian nasa lehzualin kan inbuatsaih mek a ni,” a ti.
K Sapdanga hian politics inthial mekah party lian pahnihte an kal ngaiin an kal ang a, ZPM party hi kalphung tharin an kal thung dawn niin a sawi a. “Kan hma lawka inthlan lo awm tur hi ‘corruption hi la hluar zel rawh se’ ti leh ‘corruption hi um tawm ni rawh se’ ti pawl; ‘kan ram hi chhe zel mah se a pawi lem lo’ ti leh ‘kan ram hi lo tha ve tawh rawh se’ ti pawl, thatchhiat inzirtir zel pawl leh taihmak inzirtir pawl indona a ni dawn a ni,” a ti bawk.
Ram puma campaign beihpui thlak tumin ruahmanna an siam mek a, nasa takin an bei dawn tih sawiin ZPM working president hian, “Mizoram mipuite hian ZPM hi he inthlan lo awm turah hian an thawkrim ber a ni tih chu an hriat dan tur a ni,” tiin, “Kan Leader Pu Lalduhoma pawhin ‘kan party zingah hian kei hi a thawkrim ber ka ni tur a ni’ tiin a lo sawi tawh a, Zoram mipuite hian kan thawhrimna hi an hmuh a ngai,” a ti a. ZPM hian an campaign-na leh lam tang an zawnnaah kut tlingin, pathian duh zawngin hma an la dawn niin a sawi bawk.