Arsenal in Premier League a hma an hruaina an ti sang tual tual a. Point 8 lai a fal turin an football tha ber an khel a, North London derby-ah an hmelma Tottenham Hotspur an hneh.
Gunners in Inrinni zana anmahni hnaih bertu Manchester City tlawm chu remchangah an la a. First half-ah game mawi khelin second half-ah an hmahruaina hum turin an tan theihzia an tilang a. 2-0 in an chak.
Tottenham Hotspur Stadium-ah an goal hmasa zawkah vanneihna an lamah a tang. Spurs goalkeeper Hugo Lloris chu chesualin Bukayo Saka cross an lamah a tilut palh. Mahse hmahruaitu nih phu zawka khel Arsenal in goal an khung belh thuai a, minute 9 hnuah captain Martin Odegaard chuan an goal hnihna a pet lut.
First half a beisei pha lo fo Spurs in nidang ang thovin second half-ah an insiamtha a, na takin goal an nawr. Mahse Arsenal goal veng Aaron Ramsdale chu an su tlang thei lova. Ani in save tha tak tak siamin Harry Kane goal khung tur leh Ryan Sessegnon tih goal turte dangin a team a chhanhim.
Gunners an tha
Arsenal in huntha an nei a, chutihrualin Tottenham nen an boruak hi a danglam a, an tan fiahna lian a ni.
Tun season-ah filawr takin an kal a, thenkhat erawhin club lian an la hmachhawn tam lo tiin fiahna tak tak an la paltlang lovah an ngai.
Spurs laka an inkhelah erawh champion turin theihna an nei tih an tilang. Odegaard bawk midfield-ah a hmuhnawm a, a sirah Saka a hlauhawm reng. Kartawpah Mykhailo Mudryk lakluh an tumna a hlawhtling lova, an squad tihchhah erawh a la ngai. Chutihrualin inhliam an neih belh loh chuan a chung ber atanga paihthlak an har viau ang.
Manager Mikel Arteta chuan, “Player-ten ti tura kan tih apiang inpekna sang tak nen tih an tum vek a, anni hi fak loh theih an ni lo. Vawiin hi hmalam a ke kan penna pawimawh tak niin ka hria.” tiin a sawi.
Blues pawh an chak
Tunhnaiah an che fuh hleithei lova, mahse Chelsea in an mamawh result neiin 1-0 in Crystal Palace an hneh.
Stamford Bridge-ah Blues tan Kai Havertz chuan Hakim Ziyech ball cross a tauh lut a. A zawna vawi thum an tlawmna chu titawpin manager Graham Potter-a kova phurrit awm mek chu engemaw chen an la kiang.