Tunhnaiah a zawna vawi thum an tlawm chu Los Angeles Lakers in an titawp a. 140-132 in Houston Rockets Thawhlehni zing khan an hneh.
Anmahni court a inkhelah Lakers tan star player LeBron James chuan tun season a a chetthat ber tum a hmang a. Point 48 score in assist vawi 9 leh rebounds vawi 8 a la.
James hian kar thum kalta a kum 38 a tlin hnua inkhela point 40 a score tlin tum thumna a ni a. NBA regular season inkhelah point 40 a score tlin vawi 72-na niin NBA chanchinah Michael Jordan chiahin kum 35 tlin hnua point 40 score tlin a ngah zawk a. Jordan hian vawi 12 neiin James hian vawi 8 a nei mek.
Russell Westbrook chuan Lakers tan point 24 a thawh ve bawk a. Nimahsela Lakers in tunhnaia an ‘defensive game’ chhia an la chhawm a. Point score thei viau mahse an khingpuite an veng hleithei lo.
“Tunhnaiah ka chau tak zet a, zanin pawh awl thei ka ni. Mahse kan team hian ka awl hi a thatpui dawn lova, chuvangin chawlh hahdam ka tum lo.” tiin James chuan inkhel zawhah a sawi.
Lakers hian season harsa an hmang mek a. Western Conference-ah 13-na an ni mek a, Play-In tournament khelh phak tumin ke an pen mek.
Season chawhnu lam an khar that theih nan team thuam that dan kawng an dap bawk.