UFC heavyweight champion hlui Francis Ngannou chuan contract thar an zawrh a pawm loh chhan a sawifiah a. UFC in contract an zawrh a ziah chuan ama duhdana thutlukna siam theihna tur zalenna a nei tlem dawn niin a sawi.
Kum 36 mi Cameroonian-French mixed martial artist hian kartawp khan UFC a chhuahsan tih UFC president Dana White chuan a sawi tawh a. White chuan contract an zawrh a pawm lo tih a sawi.
Ngannou hian thil awmdan a sawifiah a. Hun rei tak UFC nen indawrna an neih chhungin a contract a tel tura duh a neih nual thu a sawi a. Heng zingah hian a contract chu ‘fight’ vawi thum neihna tur nise, UFC in pawhsei theihna an neih thin chu awm lo se, hei bakah hian contract thar a ziah dawn chuan UFC in fighter zawng zawngte hnenah health insurance pe se tihte a ni a. Hengte hi an pawm lo tih a sawi.
Ngannou chuan, “An contract min zawrh kha ka ziah chuan, zalenna ka nei dawn lo.”
“Kha contract-ah khan engmah chanvo leh thuneihna ka nei ve dawn lova. Sawi ve theih ka nei dawn lo. Thuneihna zawng zawng an hnenah ka hlan dawn tihna a ni a. An hnena thuneihna a awmin an hman duh dan hi eng ang tak nge a nih hi ka lo hmu ve tawh thin.” tiin contract thar an zawrh a hnawl chhan a sawi.