Pakistani court chuan Muslim hmeichhe pakhat chu Islam sakhaw dintu, Prophet Muhammad-a leh a nupuite zinga pakhat thlalak thehdarha a tibawrhbang tiin thi turin a ti.
An ram hmar lam, Rawalpindi -a trial court chuan Nilaini khan Aneeqa Ateeq-i hi an rama blasphemy law khauh tak hmanga hremna pein he dan hnuaiah hian Prophet Muhammad-a tibawrhbang chu thi tura hrem ngei tura tih a ni.
“Tibawrhbanga an puhnaah hian hmelchhia hian WhatsApp-a a status-ah lem deuhva siam chawp lem hmangin amah hektu hnenah hian a thawn bawk a ni, heng hi Muslim tan chuan ngaihdam theih a ni lo,” tiin Judge Adnan Mushtaq chuan hremna a peknaah a ziak.
Kum 26 mi, Ateeq-i chuan hetiang a tih loh thu a sawi a, a thubuai hi May, 2020-a siamsak kha a ni.
Court-a Ateeq-i’n a sawi dan chuan amah puhtu, Hasnat Farooq-a hian a ngaihzawn avang leh thian tha anga a hnar avangin amah puhchhiat theihna remchang zawngin sakhaw chungchang sawipuiah a sawm a. Anni pahnih hi online multiplayer game lar tak atanga intawng niin WhatsApp hmangin an inbe zui a ni.
“Heng thil hi phuba lak nana a tih a ni a, WhatsApp-a kan inbiaknate chu ka tana tha lo tur ang chi zawng zawng a la khawm a ni,” a ti bawk.
Farooq-a ve thung chuan sakhaw tihbawrhbanna lam thil hi Ateeq-i hian WhatsApp status-ah a hmang a, paih (delete) tura a tih pawhin a duh lo zawk tih a sawi ve thung.
Ateeq-i thi tura tihna hi Lahore High Court-in a pawmpui leh phawt a la ngai dawn a, a duh chuan ngaihtuah nawn turin a ngen (appeal) thei bawk.
Sakhaw tihbawrhbanna hi Pakistan-ah chuan thil pawi tak niin dan khauh tak neiin hremna pawh a hrang hrang a awm a. Thenkhat chu dam chhunga tan theih a ni a, Prophet Muhammad-a sawichhia erawh thi tura hrem ngei tur a ni thung.
Hetih rual hian sakhaw tihbawrhbanna an lak nat avang hian hetianga tia mi puha tharuma beihna te, mipuiin a titua puh chil mai leh hetiang lam a thlen phah tam thung.