Myanmar chu sipaiten thuneihna an chan atanga chawlhkar khat dawn a liam hnuah mipuite chuan duh lohna an lantir zui zel a. Nimin khan mi sing chuang zet an khawpui lian ber, Yangon-ah duh lohna lantirin an pung khawm leh a, kum 2007 hnu lama duh lohna lantirna lian ber a ni.
“Mipui rorelna kan hmuh hma chu kan kal zel dawn,” tiin an zinga pakhat, Myo Win, 37, chuan AFP news agency hnenah a sawi.
“Sipai rorelna kan duh lo, mipui rorelna kan duh,” tiin mipuite hi an au rual a. Khawpui lian dang eng emaw zatah pawh sipai duh lohna hi lantir a ni.
Yangon-ah hian mipuite chuan kawng sen hain balloon sen an keng bawk a, hei hi Suu Kyi-i party rawng a ni a. Car leh bus pawhin horn tiri chungin an zui bawk a. Mi tam takin kutzungtang pathum tilawrin sipai an duh lohzia an tilang.
Nimina Yangon khawpuia mipuiin duh lohna an lantir hi kum 2007-a Saffron Revolution hnua duh lohna lantir lian ber a ni a. Hemi tum hian puithiam (monk)-ten sipai sorkarna duh lohna an lantir a ni.
Police-te chu truck leh riot gear nena inthuamin Yangon University bulah an inring a. Mipuite hian khawpui laili, Sule Pagoda an pan khawm a, tharum thawhna thleng thawm erawh hriat a ni lo.
Hetih lai hian mipuiten hruaitu atana an thlan, Aung San Suu Kyi leh President Win Myint chu chu sipaiten a chenna inah an la hreng chhunzawm zel.
Mihring dikna chanvo humhalhtu pawl, Amnesty International chuan internet tihthih chu ‘nunrawnthlak leh lainatna nei lo’ tia sawin Myanmar-ah hian mihring dikna chanvo palzut a nih a rinawm hle tih an sawi bawk.
Sipaite hian engmah an sawi lo va, February 1-a thuneihna an chan atangin internet hi a la mumal leh lo.
Sipai roreltute hian November thlaa inthlanpuia NLD party-in hnehna an channa an duh loh hnua hetianga an chet hnuah, parliament session chu tan an tum ve mek.