MPCC President Lalsawta’n mihringte hi famkim lo an nih avangin hun kal tawhah tihfel loh tam tak nei mah se, hun liam tawh chu koh kir theih a nih loh avangin Pathianin khawvela nungdama a dah chhan zawk chu an thlir reng a tul thu a sawi.
Thawhtanni khan Positive Women Network of Mizoram (PWNM) hotute leh MPCC President Lalsawta te chu PWNM Office, Upper Khatla-ah an inkawm a. Mizorama HIV a tlakhniam theihna tura kawng awm dan leh hmalak dan turte an sawiho.
An inkawmnaah Lalsawta chuan mihring hi ran ang maia Pathianin a siam a nih loh avangin nunhona kawngah nasa zawka harsatna leh inpuih ngaihna kawnga tan lak ho a tul tih a sawi a. “Harsatna hi tu chungah pawh a tla thei vek. Harsatnain a tuai hriam loh mihring an chhawrtlak loh. Harsatna tam tak paltlanga beidawnna leh manganna hmachhawntute hlawhtlinna hi a hlu bik a ni,” a ti.
Lalsawta chuan vanduaina a thlenin indawmkan leh inpuih tawn hi Lal Isua zirtir dan a ni tih sawiin, “Harsatna kan tawhin vanduai bika inngaihna hian rilru dik lo min pe a, kan nih tur ang ni phak lovin min pawtthla thin,” tiin, Pathianin khawvela nungdama a dah chhan zawk hi an thlir reng a tul tih a sawi.
PWNM hotute chuan harsatna tam tak paltlanga PWNM din tan dan leh an hmalak chhoh dan te leh mi dangten damna an chan theihna tura an bul tan a nih dan te, sorkar nena an thawhona hrang hrang te, tun hnaiah bakah kohhran hrang hranga kohhran hmeichhiaten hemi kawnga an thawhpuina an hlawkpuizia te bakah Mizorama HIV dinhmunte sawiin, inenkawlna tha dawngtute dinhmun leh an harsatnate an sawi a. HIV darh zel tur venna kawngah a thawktute hmalakna ruahmanna tha zawk nena hmathar a ngaih thu an sawi bawk.
MPCC President Lalsawta hian PWNM tanpuina tangkafai a hlan bawk.