Aizawl : MLA inthlan lo awm tura Champhai South biala INC candidate tur, MPCC thupuangtu Dr Lallianchhunga chuan Mizoram politics tichhetute chu sum leh pai hausakna hmachhuana politics khel thintute an nih thu a sawi.
Champhai Bethel venga party mi te a tlawhchhuaka hun a hmannaah, Dr Lallianchhunga chuan, sum leh pai hausakna hmachhuana politics khel thin tute mipuite hi bungraw lei theih ang chauhin an hmu tih sawiin, “An sum leh pai hmanga lei mai theihah min ngai thin a. Mipuite kohkhawm nan an sum leh pai hmangin tawktarh an siam fo thin a ni,” a ti.
Dr Lallianchhunga chuan, “Kan thenawm state-ah te chuan cheng nuai 200/300 neih loh chuan inthlan a din ve a ngamawm tawh lo va, Mizoramah pawh hian sum nei ngahte chauh din ngamna bik ‘Bial Sakei’ a awm der tawh a ni,” tiin, Champhai district chhunga Assembly bial te hi politician mi hausa te sum thiltihtheihna hnuaia an intuk luh lohna turin an beih tang tang a tul tih a sawi.
MPCC thupuangtu chuan Champhai district chhunga bial te hi politician mi hausate thuhnuaia a awm hun a thlen chuan khawtlanga mi tha tak tak te’n politics an buaipui duh loh hun a thleng ang a, Mizoram chu politician mi hausa te kutah a awm ang a, a tuartu turte chu mirethei te an ni dawn tih a sawiin, “Politician mihausa te hian an hausak belh zelna tur bak an ngaihtuah tak tak ngai lo,” a ti.
Sum leh pai hmachhuanin politics khelh a tum loh thu sawiin Dr Lallianchhunga chuan, “Lalna leh thuneihna te hi Pathian atanga chhuak a nih ang ngeiin, chumi thuneihna hmang chuan dik tak leh fel takin Pathian duhzawnga mipuite rawngbawl sak mai hi kan tih tur a ni,” a ti bawk.