Dutch driver Max Verstappen chu a vawi thumna atana Formula One world champion a nih tukah Qatar Grand Prix-ah a chak lehnghal a, tun season-ah a vawi 14-na atan hnehna a chang.
Kum 26 mi Verstappen hi Inrinni zana sprint race-ah pahnihna niin point a amah hnaih bertu a teammate Sergio Perez chu a tlanzo thei lova, hei vang hian lehpelh theih ni tawh lovin a zawna vawi thum nan world champion a ni chiang tawh.
Tun kartawp a intlansiak hi Lusail International Circuit-ah neih a ni a. Tlankawng hi bike intlansiakna lian MotoGP tlanna tura design a nih avangin intlansiak a nghawng.
Tlankawng siamdan leh a kawng tih mam dan chu ram dang ang a nih loh avangin FIA lamin driver-te him zawk nan tyre pakhat chu lap 18 aia tam hman a phalsak lo. Lap 57 intlansiak turah team tinte vawi thum tal an car ke an thlak a ngai tihna a ni.
Hei chauh hi ni lovin kar 12-na leh 13-na chu a him zawk nan tihzim a ni a, hei vang hian driver ten ‘track limit’ penalty an hmuh hnem phah.
Intlansiakah erawh pakhatna atanga bul tan Verstappen a chungnung a, pahnihna leh pathumna Mercedes car te an tlan tanin an intai a, Lewis Hamilton chu car chhia in pahnihna a awm George Russell chu a tlakhniam phah a. A tawpah erawh palina a ni tho.
Tun kartawpa Red Bull car tih lova tlan chak thei tak McLaren driver pahnihten pahnihna leh pathumna an luah a, Verstappen a chungnung viau chunga intlansiak zawhah second nga vel baka an inthlau lo chuan fak an hlawh phah a, season tawp khar tha turin an lakah beiseina a sang.
Verstappen chuan, “Ka world title lak tawhah tha ka la tih ber a ni. A hmasa ber kha chu ka tumram ka thlenna a ni a, rilru ah thil tam tak a awm. Intlansiak apiangin hmasawn ka tum a, intlansiak zawha ka thlirletin kuminah a lungawithlak ka ti thin. Hei vang hian kumin hi ka chetdan thlirin ka world title tha ber niin ka hria.” tiin a sawi.