Lunglei Municipal Council (LMC) Chairman Lalzuithanga Khiangte-in nimin khan Mizo Academy of Letters, Jt hqrs., Lunglei Golden Jubilee Souvenir ‘Fin Khawm’ a tlangzarh.
Lunglei Bazar Veng-a DRO Pisa Hulhliap-a tlangzarh inkhawmah khuallian LMC Chairman Lalzuithanga Khiangte chuan, Golden Jubilee hriat reng nana Souvenir ‘Fin Khawm’ an buatsaih chu lawmawm a tih thu sawiin, Mizo literatur tihmasawn a, a tihchangtlun bakah Mizo zia leh nihphung te vawn nun a nih theih nana tangkai tan ni tura a duh thu a sawi a. Mizo tawng humhalh leh venhim kawngah tan la thar a, MAL te hmalakna tawiawm theuh turin kalkhawmte a chah.
LMC chungchang sawiin Lalzuithanga Khiangte chuan, LMC-in hna an thawh theihna turin tan chhan tur hna an neih a ngaih avangin dan leh thupek paruk – parking regulation and rules 2023 te, building regulation and rules 2023 te, solid waste management regulation and rules 2023 te, plastic waste management regulation and rules 2023 te, licencing regulation and rules 2023 te, Advertisment and hoarding regulation and rules 2023 te hi peihfel vek a nih thu a sawi a. Cabinet approve hnuah a taka hnathawh a nih tur thu a sawi bawk.
Souvenir Committee chairman K.T. Chhawna kaihhruai tlangzarh inkhawmah hian, ‘Fin Khawm’ souvenir chu Zonunkimi’n a thlir lawk a. Kum 50 tlin lawmnan MAL Jt, Hqrs, Lunglei-in ‘Fin Khawm’ an buatsaihah hian, thu hrang hrang lak khawm niin thupui hlawm 27 a awm a, thuchham, lengzem, autobiography bakah zirlai te tana tangkai tur tawng upa hman dan te, Award hrang hrang te, Mizo tlawmngaihna te a tel a ni.