AZL: Aizawl District Bawrhsap Nazuk Kumar hovin nimin khan Aizawlah ruihhlo chungchanga hmalakna chi khat, Nasha Mukt Bharat Abhiyaan, Aizawl district hnuaia Sub-Committee on Drug Prevention in Schools & College te chu an thukhawm.
DC Conference Hall, Aizawl-a thutkhawmah hian Sub-Committee hmalakna leh hmachhawp hrang hrang te thlirho niin, ruahman thenkhat te an sawi ho a. Ruahmanna sawiho zingah College zirlaite atanga Master Volunteer te ruat a, training pek an nih hnuah an rualpui thalai/zirlaite zingah ruihhlo that lohzia leh a invenna te an zirtir dan tur te leh College hrang hrangah zirtirtute kaihhruaina hnuaiah Anti-Drug Club te din an rel a ni.
Thutkhawmah hian Higher & Technical Department aiawhte, college hrang hrang Principal te leh an aiawh te an tel bawk.
Kum kal ta lamah pawh khan Nasha Mukt Bharat Abhiyaan hmalakna in Master Volunteer te kaltlangin zirlaite zingah ruihhlo chungchang zirtirna an lo pe tawh thin a, a mamawhte hnenah counseling te pein mi eng emaw zat inenkawlna hmunah te an lo thawn tawh bawk a ni.