School of Nursing Thingdawl (SO- NT), Kolasib-in nimin khan an School auditorium-ah General Nursing & Midwifery (GNM) 7th batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) leh 4th batch SONT aṭanga zirchhuak te certificate hlanna hun (Graduation Ceremony) an hmang.
SONT zirlaite lukh- um khumtir leh khawnvar chhi-a thu tiam lakna hun leh zirchhuak te certificate hlanna hun hi Mizoram sorkara Health & Family Welfare Department Principal Director, Directorate of Nursing Director ni bawk Dr Vanlalsawma’n a hmanpui a. Zirlaite leh zirchhuak te fuihna thu sawi- in, “damlo enkawltu ten damlote tana kan tih th- eih sang ber chu ṭawngka leh chetziaa hmangaihna lantir a ni” a ti.
Dr Vanlalsawma chuan damlote rilru taka hmangaih leh duhsak a pawimawh tih awiin, nurse-te chu damlote nena inngheng hnai ber an nih angin damlote enkawl chu an kutah a innghat thuk hle tih a sawi a. SONT Kolasib-a zirlaite chu ram tan leh midang te tana rawngbawl thei tura ṭha taka an zirlai zir chhuah tum tur te, zirchhuak tate pawh nurse hna zahawmna chawinung zel tur leh midang tana malsawmna nih tum zel tur tea chah- in, duhsakna a hlan a ni.
Joint Director (Nursing) Lalchhanhimi’n 7th batch zirlai tharte lukhum khumtirin, khawnvar a chhittir a; zirlai tharte chuan thu tiam an sawi rual bawk. Lalchhanhimi chuan lukhum chu nurse hna zahawmna kengtu pakhat a nih thu sawiin, lukhum var chuan thianghlimna leh damlo, miharsa leh mangangte tana inhlanna leh inpekna a entir tih a sawi a. Khawnvar chhit chu Florence Nightingale-i hniakhnung zuia midang tana beiseina mei eng chhi zel tura intiamna a nih thu a sawi.
Kum 2023 Mizoram Nursing Council exam-a 1st year topper Lalremruati hnenah Lalchhunga (L) Memorial Award chu donor, School Principal Lalṭanpuii’n hlanin, SONT Kolasib aṭanga top 10-a lang 2nd year zirlai pahnih leh final year zirchhuak pahnih hnenah District Hospital Kolasib-a District Medical Superintendent Dr Samuel Lalfakawma Fanai-in chawimawina (merit prize) a hlan bawk.
Sorkar thuchhuahin a tarlan danin School of Nursing, Thingdawl, Kolasib hi December 2017 khan zirlai 20 awma bulṭan niin, batch 4-in an zirchhuak tawh a. GNM chu pawl 12 pass hnua zir theih niin, kum 3 zir (course) a ni a. SONT Kolasib-ah hian Principal 1, tutor 6, non-teaching staff 9 leh zirlai 60 an awm mek a. Tun ṭumah hian 4th batch aṭangin zirchhuak (graduate) mi 20 (mipa 1 leh hmeichhia 19) awmin, 7th batch 1st year zirlai 20 (hmeichhia vek)-in thu tiam an la thar ve thung a ni.