Ecuador-a lung in pathuma buaina nasa tak chhuakah mi 75 vel an thi a, mi thahnem takin hliam an tuar bawk niin thuneitute chuan Thawhlehni khan an sawi.
Thuneitute chuan Guayaquil, Cuenca leh Latacunga khawpui tan ina buaina chhuak hi mi tangte zinga mi sual pawl (gang) intihbuai vang niin an sawi.
Tual chhung chanchinbute chuan tangte hi silai leh chem hmanga inbeiin an inthat niin an tar lang.
“Mi sual pawl pahnih, tan in chhunga thuneitu zawk nih inchuh avanga buaina chhuak a ni,” tiin prison agency director Edmundo Moncayo chuan a sawi.
Police office koh luh 800-te nen tan in chhunga buaina hi ching felin a tawp fel tawh niin a sawi bawk.
Police pawh thahnem tak an inhliam niin Moncayo chuan a sawi a, thi erawh an awm lo.
Ecuador khawthlang lama lawngchawlhna khawpui, Guayaquil tan ina buaina chhuak chin fel tuma thuneituten an luhchilh lai hian pawnah mi tang chhungte chuan thuthar ngaichangin an awm thup a, he lung in bikah hian mi 21 an thi niin thuneitute chuan an sawi.
Chhim lama Cuenca tan inah mi 33 leh Latacunga-ah mi pariat an thi bawk niin sorkar hnuaia tan in lam viltu, SNAI director Edmundo Moncayo chuan a sawi.
Buaina chhuah tan hi Thawhlehni zing dar 9:00 (India-a zan dar 8:30) pelh atangin a ni a, Police General Commander Patricio Carrillo chuan venhimna khauh taka kalpuina tan inah buaina a chhuah thu hi Twitter-ah a tar lang.