Foundtion For Drug-Free Mizoram chuan Krismas Luanchhuahna programme hmangin, ruihhlo avanga harsatna tawkte enkawlna home pathumah tanpuina an hlan.
Ruihhlo laka humsual an dai hma a Mizo tleirawlte ven hna thawktu pawl, Foundation For Drug-Free Mizoram chuan Krismas lo thleng tur puala an member zinga mi inphalte atangin sum fai an hmuh cheng nuai 1 hu man thilpek an lakkhawm atangin, Phunchawng OKM Home, Durtlang North-a Jeriko Khualbuk leh Khawngaihna In, Chaltlang te tlawhin, tanpuina Inrinni khan an mamawh chi hrang hrang eitur buhfai, dal, alu leh thildang an hlan.
He pawl dintu, Vee Mathara chuan kuminah, kum 19 kal ta chhunga ruihhlo vanga thihna a thlen tam ber tum a thleng tih sawiin, mi 70 an thi tawh niin a sawi a, an pawl chuan tihtur an ngah hle tih a sawi.
Foundation For Drug-Free Mizoram hi April 1, 2019 khan din a ni a. Tunah hian member 930 an nei mek a. An pawl rawngbawlna kaltlang hian tleirawl mi 12,000 te chu signature card-ah hming ziakin, ruihhlo laka fihlim turin an lo intiam tawh a ni.