Aizawl: Geology & mining (G&M) department chuan sorkar kum mek chhungah chhiah leh fee hrang hrang an lak atangin Rs vaibelchhe 8 chuang an hmu tawh.
G&M department Director R. Zirtluanga’n The Zozam Times a hrilh danin sorkar kum kal mek thla sarih chhungin lung lakna atangin Rs. 6,93,92,886 an hmu a, balu lakna atangin Rs. 46,66,378 an hmu a, ONGC, OIL India te atangin petroleum- exploration licence (PEL) fee atangin Rs. 1,24,99,890 leh thil dang atangin Rs. 2,00,830 an hmu a, kumina royalty leh sum an chawitir atanga sum an hmuh zawng zawng hi Rs. 8,67,59,984 a tling tawh a ni.
G&M director chuan sorkar kum, 2023-2024 chhunga sorkara sum an chhun lut tura an tuk chu Rs. 11,80,00,000 a nih thu leh tunah hian an target an la phak loh na chu Rs. 3,12,40,016 a ni tih a sawi a, an target hi an khum ngei an beisei tih a sawi a, kuminah lung lak phalna (mining permit) mi 37 hnenah an pek chhuah tawh thu te, mining permit tharthawh 227 a awm bawk thu a sawi.
R. Zirtluanga chuan Mizoram chhungah lungalhthei zawng tura hma an lak mek thu sawiin, “Mamit district chhung Thinghlun leh Lunglei district chhung Rotlang West-ah te thawh tum a ni,” a ti a, hetihlai hian Mamit district leh Rotlang (W), Lunglei district-ah a zawnna hi thawh tum a ni a; mahse, Thinghlun hi reserve forest a nih avangin forest phalna hmuh hma chuan tender chhuah theih a ni lo tih a sawi.
Rotlang (W)-a lungalthei zawnna tura tender chhuahna tur document chu Law & Judicial Department-ah vet turin a awm mek tih a sawi bawkin, hemi zawhah hian Central Mine Planning & Design Institute hnenah final vetting neih tura thawn a nih tur thu leh an pawm veleh tender hi float theih a ni dawn tih a sawi a ni.