Aizawl: Presbyterian Kohhran, Chanmari, Aizawl chuan nimina Sunday School inkhawmah hla phuahtu pahnih, an kohhran member ni bawkte chawimawina hun an hmang.
An chawimawi te hi Kristian Hla Bu No. 129 ‘Khawvel thim en tura chu’ tih hla phuahtu, Thandanga, kum 93 leh KHB No. 121 ‘Kum sul liam hnu kan nun ngaih lai tho leh thin’ tih phuahtu, C. Lalkhawliana, kum 86-te an ni.
An pahnih hian chawimawina thuziak leh pawisa fai Rs. 5,000 ve ve an hlan a, an hla phuahte hi kohhran mipuiten an sa ve ve bawk.
Thandanga hi taksa chak lohna vangin he hunah hian a inkhawm thei lo va, KHB No 129-na a phuah dan leh lawmthu a sawina record ngaihthlak a ni.
C. Lalkhawliana hian kohhran mipuite hmaah KHB No. 121-na a phuah dan a sawi.
C. Lalkhawliana hi MJA president lo ni tawh leh Mizorama saptawng chanchinbu hmasa ber Highlander editor ni mek a ni.