Aizawl : Presbyterian Bible School (PBS) chuan Batch 56-na pualin Zirtawpni khan Farewell and Dedication Programme, Pi Zaii Hall, Synod Conference Centre-ah an hmang.
Programme hi Rev. Lalrinsanga, Principal-in a kaihruai a, Rev. Dr. C. Chawnghmingliana, Synod Moderator-in zir chhuakte hnenah certificate hlanin thuchah a sawi a, zirlai exam-a ti thate hnenah Upa Dr. Lalnunsiama Colney, Synod Statistician-in lawmman a hlan a, class kal kimte hnenah Rev. P.B. Mankima, Synod Secretary (Jr)-in lawmman a hlan a, Pu C. Awithanga Award chu Upa B. Lalhmunliana, Synod Secretary (Sr)-in a hlan bawk.
PBS-ah hian a din tirh atangin tun thleng hian zirlai 2691 an awm tawh a, chung zinga 2246 ten tha takin an pass tawh a. Tuna batch 56-naah hian zirlai 64 awmin zirlai 59 ten tha takin an pass a, exam lo panga an awm.
Exam-a ti tha zual, pakhatna K Vanlalhruaia s/o K. Lalrosanga, Champhai Venglai Kohhran hnenah Rs 1,000, pahnihna R. Malsawmzuala s/o R. Biakremmawia (L), Sentlang Kohhran hnenah Rs 700 leh pathumna Vanlalrohlui d/o L. Thanglianmawia, Bawngkawn Chhimveng Kohhran hnenah Rs 500 hlan a ni a. Pawisa fai bakah lawmpuina thuziak PBS Committee hminga hlan theuh an ni.
Batch 56-na zirlai zingah hian class kai kim mi 16 hnenah lawmman Rs. 500 hlan a ni bawk.
Kum 2014 atangin Christian Theology Subject leh Kohhran Inrelbawlna leh PCI Constitution Subject-a ti tha berte hnenah Pu C. Awithanga Award hlan thin a ni a. Tun tumah hian Christian Theology-ah Benjamin Lallawmkima (91%) leh Kohhran Inrelbawlna leh PCI Constitution-ah K. Vanlalhruaia (93%) ten he Award hi an dawng a ni. Award hian Rs.1,000 a keng tel a ni.