NGO Coordination Committee hruaitute chuan nimin khan Chief Election Commissioner (CEC) leh a thawhpui election commissioner-te chu Mizoram State Assembly inthlanpui neiha vote chhiar hun sawn chungchangah ECI office, Delhi-ah an kawm.
An inkawmnaah hian Sr. Deputy Election Commissioner leh deputy election commissioner te an tel bawk.
Inkawmhona hun tha tak hnuaiah NGOCC hruaitute hian Mizoram inthlan vote chhiar hun December 3, 2023 chu Pathianni a nih avangin a hun sawn turin an ngen a, Chief Election Commissioner chuan NGOCC duh dan leh ngenna te chu inkawmhonaah hian election commissioner pakhat a tel loh avangin member kima an sawiho vat tur thu a sawi.
NGOCC hruaitute hian beiseina sang tak an nei tih sawiin, inthlan vote chhiar hun sawn chungchangah leh ECI hotute hmuh chungchangah hian Mizoram mipui te, kohhran hrang hrang leh political party te tanrualna te avangin lawmthu an sawi.
ECI hotute hmuhnaah hian NGO Coordination Committee Chairman, Central YMA president ni bawk, Lalhmachhuana; NGOCC Secretary leh Central YMA General Secretary Prof. Malsawmliana; MUP Vice President Lalbiakmawia Khiangte; MZP President H. Lalthianghlima leh MSU Finance Secretary Lalrampana te an tel a ni.