Aizawl: Aizawl Municipal Corporation (AMC)-in chenna in bul hnaia vawk vulh khuahkhirh a tum chungchanga inkaihhruaina dante thlirhoin nimin khan AMC hotute leh Local Council Association hotute mayor room-ah an thukhawm.
Thutkhawm hi Aizawl Mayor Lalrinenga Sailo-in a kaihruai a, AMC-in vawk vulh chungchanga inkhaihruaina dan a lo duante chu uluk taka sawiho a ni a, Aizawl khawpui chhunga vawk vulhtu zawng zawngte chu vawk vulh kawnga inkaihruaina dan zawm theuh turin an ngen a ni.
AMC Board of Councillors thukhawmin thutlukna a lo siam tawh angin Aizawl khawpui chhung a lo thianghlima mipui an lo hrisel zawk nan leh leimin vanga chhiatna thleng a tlem zawk theih nan mihring chenna in atanga feet 100 aia hnaia vawk vulh chu January 15, 2024 atangin khuahkhirh a ni dawn a ni.
Vawk vulh chungchanga harsatna bik neite chuan local council atanga recommendation lain AMC-ah exemption dilna thlen theih a ni dawn a ni.