Indonesia rama tuialhthei thlitfimna lian bera kangmei rapthlak tak chhuak chu a thelh hna hautak tak thawh mek a ni.
Balongan refinery hi sorkar oil firm Pertamina enkawl niin an ram sanaa Thawhtanni zing dar 12:45 (India-a Pathianni zan 11:15) vel atanga chhuak tan a ni.
Mi panga velin hliam an tuar tawh a, a bul hnaia cheng mi 950 vel hmun himah suan chhuah an ni a. Chin hriat loh an awm nual bawk nia sawi a ni.
Kangmei chhuah chhan hi hriat theih a la ni rih lo.
TV leh social media-a video tihchhuahah chuan nimin tuk thleng khan kangmei hi a la nasa hle a, West Java province-a tuialhthei thlitfimna hmun chungah hian meikhu dum tak a khu chho nasa hle.
“Tuialhthei rim na takin min ur a, ka hnar pawh a na vek tawh a, tek tla ang a ni,” tiin a bul hnaia cheng pakhat chuan Metro TV hnenah a sawi niin Reuters chuan a tar lang.
Regional disaster management agency chuan damdawi inah mi panga hliam na deuh tuar enkawl an nih thu leh mi 15-in hliam na vak lo an tawrh thu an sawi.
Hliam tuarte hi a bul hnaia cheng leh kangmei a chhuah tan tirha a bul kawngpuia lo kalte an ni.
A bul hnaia chengte hi Covid-19 hri leng laka himna ngaihtuah chungin camp hrang hrangah sawn chhuah an ni.
Balongan refinery hi Jakarta atanga khawchhak lam km 200 vela hla niin hectare 340 vela zau a ni a, ni tin tuialhthei barral 1,25,000 vel thlitfimna hmun a ni.