Mizoram Assembly inthlanpui neiha vote tlate chu Pathiannia chhiar turin district hrang hrangah inbuatsaihna peih fel thawkhat a ni tawh.
Aizawl district chhunga constituency 12-a vote tlate chhiar tura inpuahchahna chu Thawhlehni khan Aizawl District Election Officer Nazuk Kumar hoin DC Conference Hall-ah neih a ni.
Aizawl bawrhsap ni bawk, Nazuk Kumar chuan returning officer-te leh official mawhphurhna changte chu ECI-in dan a siam hre bel tura chahin, mahni mawhphurhna theuh tha taka hlen turin a hriattir.
He hunah hian Aizawl SP hnen atangin venhimna lam chungchanga ruahmanna siam dan report ngaihthlak niin Sr. SP Traffic chuan hemi ni atana counting centre tina lirthei dahna tur leh lirthei tlan dan siam rem dan ruahmannate a sawi a. I&PR joint director-in media kaltlanga thupuan chhuah leh media mite tana ruahmanna siam ngai chungchangte a sawi bawk.
Thutkhawm zawh hian counting centre pathum – DC Office, Assembly Annexe leh GAC, Sikulpuikawn te chu an tlawh nghal a, ruahmanna siam belh ngaite enfiah a ni bawk.
Nimin khan Mamit district chhunga Mizoram assembly inthlanpuia candidate agent-te nen vote chhiar hun atana inkaihruainate chu District Election Officer V.L. Remliana hovin an thlirho.
Mamit DEO chuan candidate agent-te tana counting room-a dan zawm turte sawiin, ECI duh dan angin inkaihruaina dante zawm vek turin political party hrang hrang candidate agent te a chah.
Champhai district huam chhunga MLA bial pathuma vote tlate chhiar tura inpuahchahna kal zelah, nimin khan Champhai bawrhsap leh DEO James Lalrinchhana hovin political party-te counting agent-te, candidate agent-te leh media-te tan Champhai DC Conference Hall, Keifangtlang-ah an training.
Ruahman lawk dan chuan Champhai district chhunga MLA bial pathuma vote tlate hi zing dar 8 atangin DC Office, Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin counting hall tinah hian vote tlate chhiarna tur dawhkan pariat theuh a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni.
Zing dar 8-ah postal ballot-a vote tlate chhiar tan tur niin, dar 8:30 atangin EVM-a vote tlate chhiar tan a ni dawn a, vote chhiar hi round li-ah zawh fel tum a ni a. Counting agent-te hi counting table tin zawnah party tin aiawh an thu dawn a ni.
Serchhip DC David Lalthantluanga hovin nimin khan Serchhip district huam chhung assembly constituency pathuma vote tlate chhiar dan tur leh inbuatsaihna chipchiar taka thlirho a ni.
Serchhip district chhunga assembly constituency pathum – Serchhip, Tuikum leh Hrangturzo tan counting hall pakhat theuh ruahman a ni a. Serchhip DC Conference Hall, DC Meeting Hall leh E-District te chu ECI kaihhruaina leh duhdan anga chei that niin, peihfel thawkhat tawh.
ECI duh dan angin counting hall chhungah hian EVM-a vote tlate chhiarna tur dawhkan pariat theuh siam a ni a, postal ballot chhiarna tur dawhkan pahnih, Tuikum leh Hrangturzo Constituency tan dawhkan pakhat ve ve dah niin VVPAT chhiarna tur a bika hung hran (enclosure) pakhat dah vek a ni bawk.
Kolasib-ah pawh District Election Officer John LT Sanga hovin Kolasib DC Conference Hall-ah vote chhiar nia venhimna lama security duh dan tur te, counting area huam chhunga lirthei hun dan turte leh venhimna kalpui dan tur hrang hrang an sawi ho.
Lawngtlaiah pawh nimin vek khan vote tla chhiarna kalpui dan turte DC Conference Hall-ah neih a ni a. District Election officer Joseph H Lalramsanga kaihhruai thutkhawmah hian Superintendent of Police, Returning Officer, Assistant Returning Officer, Election Officer, Political Party hrang hrang aiawhte leh official dangte an tel a ni.
He huna Joseph H.Lalramsanga sawi danin vote chhiar dan tur tihchhinna, dress rehearsal pawh hlawhtling tak a kalpui a nih thu leh vote chhiarna kalpui hunah counting observer pathum an awm tur thu te, nimin thleng khan postal ballot leh service vote 1,572 dawn tawh a nih thu leh chungte chu Tuichawng bial atangin 384, Lawngtlai West bial atangin 453 leh Lawngtlai East bial atangin 735 a nih thu a sawi bawk.
Heng district bakah, district dangah pawh chawlhkar kalta chhung leh tun chawlhkar chhung hian MLA inthlanpui neiha vote tlate chhiar dan turte enchhinna thawh khatnate neih zawh a ni deuh vek tawh niin, inbuatsaih peih fel thawkhat a ni deuh vek tawh a ni.