MLA inthlan vote chhiarnaa Champhai district-a duty tur office staff te tan nimin khan Champhai-ah training buatsaih a ni a. Champhai Bawrhsap, DEO ni bawk James Lalrinchhana’n hovin, office staff te chu an thawhrimna leh inpekna fakin vote chhiar ni ah pawh thahnemngai leh uluk taka duty turin a chah.
SDO (S), State Le- vel Master Trainer ni bawk Lalrinawma Khiangte-in office staff-te mawhphurna hrang hr- ang leh vote chhiar ni a tih tur leh tih loh tur te a zirtir a. Chawhnu lamah counting hall tinah vote chhiar chhinna neih nghal a ni.
Duty tur office staff te chu group hrang hranga then niin, Data Entry Operator, Hall Duty, Videography, St- rong Room Duty, EVM Carrier, EVM Sealing, Reception, Ushering, Refreshment leh Official Communication Centre duty-te an awm dawn a ni.
Ruahman lawk dan chuan, Champhai district-a MLA bial pathuma vote tlate chu December ni 3, 2023 (Pathianni) zing dar 8 atangin DC Office, Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin, counting hall tinah vote tlate chhiarna tur dawhkan 8 theuh leh VVPAT Slip chhiarna tur a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni. Postal Ballot-a vote tlate chhiar hmasak a ni ang a, chumi hnu ah EVM-a vote tlate chhiar a ni ang. Round 4 ah zawhfel tum a ni.
Kolasib district-ah pawh nimin vek khan BDO Thingdawl, District Level Master Trainer ni bawk F. Lalnisai’n inthlan vote chhiar dan kalphung leh micro observer-te tana hriat tur pawimawh hrang hrang a zirtir a. Zawhna leh chhanna leh sawihona hun an hmang bawk.
Saitual-ah pawh vote counting rehearsal neih a ni a. Saitual District-a MLA bial 3-a vote tla chhiar turin Counting official 126 ruat an ni a, Counting supervisor 40, Counting Assistant 44 leh Micro Observer 42 te an ni.
Round thuma vote chhiar tura ruahman a ni a, Saitual DC complex ah Hall pathumah chhiar a ni ang.