Democratic Republic of Congo (DRC) khawchhak lam, Butembo khawpui bulah hripui hlauhawm tak, Ebola kai hmuh chhuah thar a nih thu an ram health ministry chuan a puang.
Ebola hri kai hi hmeichhia, Biena khuaa mi a ni a, February 1 khan a kai tih hriat niin Butembo-a damdawi inah February 3-ah a thi.
Pasal nei tawh a ni a, a pasal hi Ebola a len hmasak hun lai khan a lo kai ve tawh bawk.
“Provincial res-ponse team-in theihtawp an chhuah nghal a, national response team pawhin an tlawh thuai ang,” tiin ministry chuan Pathiannia thuchhuah an siamah an tar lang.
Tuna hri leng an puan hi a darh leh a nih chuan kum 1976-a Ebola River bula he natna an hmuh chhuah hnua an ram a len vawi 12-na zet a ni tawh dawn a. Ram dang zawng zawng aiin a letin a leng zing tawh.
Thla thum pawh la liam mang lovah khan DRC-ah hian Ebola len vawi 11-na a liam tih sawiin hemi tum hian khawthlang lamah a leng a, mi 130-in kaiin mi 55 an thi.
A hnuhnung ber hi chu a na lo va, a hma leh chiahah khan an ram khawchhak lamah mi 2,200 chuangin thihpuiin Ebola lenga thi an tam ber pahnihna a ni.
DRC tan hian Ebola hi a leng leh ang tih hlauhna a lian hle a. Tunah hian ram dang ang bawkin COVID-19 vanga buaiin thunun tum an bei nasa hle a, mi 23,600 chuangin kai tawhin mi 681-in an thihpui tawh a. Invenna damdawi pawh an pe tan ve thei thuai turah an inngai.
Ebola hi khawsik sang tak siamtu niin a kai taksa atanga tuihnang chhuak atanga kaichhawn theih a ni a. A na deuhvah chuan kawchhunga thiput thlenga siamin ka, mit leh beng atanga thi chhuak pawh a thlen thei.