Aizawl: Chief Minister Lalduhoma’n nimin khan Sakawrtuichhuna Tawngtai Bethel Camping Centre (TBCC) tlawhin, zu leh ruihhlo laka thalaite humhim an nih theih nan sorkar theihtawp a chhuah tur thu a sawi.
Zirtawpnia chief minister atana lakluh a nih zawhin Lalduhoma’n Raj Bhavan atangin TBCC a pan nghal a, he centre enkawltute leh damlo enkawl lai mi 860-te chuan chhung inkhawm an lo buatsaihsak.
Inkhawmah thu sawiin chief minister chuan an sorkar huna tihtur pawimawh an duante zinga pakhat chu ‘ram rorelnaah Pathian ram lo thleng rawh se’ tih a nih thu sawiin, “He Pathian lal ram lo thleng tur lo dipdaltu lian tak pakhat chu ruihhlo hi a ni. |halai leh pavalai thihna kan ramin a tuar nasa em em mai a, a chhan lian ber chu zu leh ruihhlo a ni,” a ti.
Chief minister atana lakluh a nih hnua mahni in pawh tlawh lova TBCC a tlawh chhan sawiin Lalduhoma chuan, “He centre leh a anpui kan rama inenkawlnate kan ngaih pawimawh vang a ni a, zu leh ruihhlo laka kan thalaite humhim an nih theih nan sorkat chuan theihtawp a chhuah dawn a, ruahmanna tha tak a siam thuai dawn a ni,” a ti.
Lalduhoma hian home te, jail te, centre hrang hrangte chu sual laka fihlim nan chauhva hmang lova an fihlim tawh hnua eizawnna leh thiamna hlu tak tak hmuh theihna hmun atana buatsaih a pawimawh thu a sawi a. Hemi kawngah hian centre-a thawktute leh sorkar an tan ho zel tur thu leh, mamawh leh tul awmte pawh inhrilh hreh lovin, hmalam pan zel turin kalkhawmte a sawm.
Inkhawm hi TBCC dintu, T.T Zohmingthanga’n a kaihruai a, kum 19 lai centre hian pum lek lek tawh a, chief minister meuhin lak luh a nih zawha a tlawh nghal chu thil thleng zen zen lo a nih thu a sawi a. Ruihhlo vanga thalai harsatna tawk mekte chhanchhuah duhtu chief minister an nei chu a thlamuanthlak a tih thu a sawi bawk.
Chief minister hi K.T Beicho, IRAS, Principal Secretary, Social Welfare & Tribal Affairs leh Dr. Lalhriatzuali Ralte, IAS, Director, Social Welfare & Tribal Affairs ten an tawiawm a, chief minister-in a tlawh denchhenin centre tanpuina thil pek, pawisa fai Rs. 50,000 a hlan a ni.