Aizawl: BJP Mizoram President Vanlalhmuaka chuan an party-in central hriatpuia hmasawnna hna thawh tur an duante Mizoram mipuiin an mamawh hunah sorkarna an la chan ve ngei a rin thu a sawi.
Nimin khan BJP Mizoramin an pisa-ah Friday Political session hun an hmang a. He huna thusawitu Vanlalhmuaka chuan, BJP chu Mizoram leh hnam tana ding an nih avangin sorkar thar lo piang pawh an tlin lohna leh fel lohna ringawt chhuia bei lovin, constructive ppposition role play turin BJP MLA-te pawh an inbuatsaih ngei a beisei tih sawiin, “ZPM hian Mizoram siam tha tura an intiam angte an tihlawhtlin ngei theih nan duhsakna kan hlan,” a ti.
Vanlalhmuaka chuan ZPM sorkar chu Mizoram mipuite pawhin an thu tiamah an din leh din loh chu an thlir reng dawn niin a sawi a. Mizoram tana tih tura an puanchhuah ang leh an manifesto angte an hlenchhuah leh hlen chhuah loah Mizoram mipui hian sorkar tha an teh dawn a, an intiam anga hna an thawh a, an manifesto an tihhlawhtlin chuan result tha tak an nei tih a lo lang mai dawn niin a sawi.
BJP chuan an manifesto neih chu Mizoram mipui tana an duan te chu tihhlawhtlin theih a nih dawn tak loh avangin pawi a tih thu sawiin Vanlalhmuaka chuan, “A bikin ZMC ringawt pawh RIMS-a upgrade tura kan tih chu, ti thei dinhmuna kan din tak loh avangin phai lam pan ngai thin te’n kan la pan fo a ngai leh dawn ta,” tiin, BJP manifesto-a an tarlan Mizoram hmasawnna tur atana an duan, central-in a hriatpuite chu Mizoram mipuiten an la mamawh loh avangin mamawh hun an neih veleh mipui zarah sorkarna an la chang ve ngei dawn tih a sawi.