South Tuipui bial MNF West block-in South Tuipui bial MLA atana thlan tlin, ZPM candidate Jeje Lalpekhlua an lawmpui thu an sawi.
South Tuipui bial MNF West block chuan nimin khan an President J. Lalchhuana kaihhruaiin Hnahthiala MNF party pisa-ah MLA inthlan zawhfel tak an thlirlet a. South Tuipui bial mLA tura thlan tlin Jeje Lalpekhlua an lawmpui thu hi an sawi a. Hnahthial district leh bial hmasawnna tura hmachhawp tam tak an la neih te chak taka bawhzuia a tihhlawhtlin ngei an beisei thu sawiin, duhsakna an hlan a ni.
Zoramthanga kaihhruai sorkar kal tawhin ram leh hnam tana a hmalak tawhna hrang hrang te pawh ropui leh chhuanawm an tih thu South Tuipui bial MNF West block chuan an sawi a. “MNF party min hruai zel tur pawhin tha kan ti a, kan ring tawk a ni” an ti.
Sorkar liamtaa South Tuipui bialtu MLA Dr. R. Lal- thangliana chu kum 5 chhung (2018 – 2023)-a bial nu leh pa nih tling, zo taka bial enkawltu nia sawiin, an thlang tling zo ta lo chu pawi an tih hle tih an sawi a. “He hun reilote chhunga kan bial mipuite mamawh leh awh ngawih Hnahthial district min tihhlawhtlinsak hi lawmawm kan ti a, kan bial leh kan district tihhmasawnna tura a hnathawh te hi ropui kan tiin kan chhuang takzet a, kan theihnghilh tawh lovang” an ti.
South Tuipui bial MNF West block chu- an Dr. R. Lalthang- liana chu an thlawp zui zel tur thu pawh sawiin, engtikah em- aw chuan an la hlawh- tlinpui leh ngei an rin tlat thu leh amah pawhin vil zui zel se an duh thu an sawi bawk.