Chief minister thar. Lalduhoma’n Zarkawta McDonald Hill-a chief minister pisa a luah lut.
Inrinni chawhma dar 11 khan Chief Minister Lalduhoma hian a pisa thar a luah lut a. Chief minister pisa a thlen lai hian Secretary to Chief Minister K Lalthawmmawia leh a thawhpuiten an lo dawngsawng a. CM Bungalow a fan kual hnuah a office chamber-ah lutin, Information & Public Relations department (I&PR) atanga file pawimawh kal chu a sign nghal a, hemi hnu hian chief minister pisa luah luh hunserh chu CM Conference Hall-ah buatsaih zui a ni.
Inkhawmah Chief Minister Lalduhoma chuan Pathian leh mipuite zarah sorkar an kalpui dawn ta a, an bultanna ni, office a luah luh niah thlarau lama puithiamten telpuiin tawngtainate an neihsak an duh tih a sawi.
Lalduhoma hian inthlan hma leh a zawh fel hnuah pawh an thawhpui mi tam takten an sawi fo chu ‘kan sorkar chuan Pathian hnena lawmthu sawina, sual thupha chawina leh inhlan tharna i nei ang u’ tih a nih thu sawiin, “Hei hi kan rilruah a lian hle a, Pathian awmpuina nen ngeia sorkarna kalpui kan duh a ni,” a ti.
Chief Minister Lalduhoma’n a pisa a luan tan niah hian cabinet minister, minister of state leh a nupui fanaute bakah Mizoram Kohhran Hruaitu Committee (MKHC) hruaitute, Mizoram People’s Forum (MPF) hruaituten an telpui a. Hunserh hmangin MPF General Secretary Rev. Lalramliana Pachuau chuan Pathian tihna nena bul an tan phawt chuan sorkar hi a kal sual dawn ngai lo va, Lalpa tihna avangain thil dik lo chu kalsan ngam tur leh, an hnathawhna kawngah sawi zung zung lova, thawk mawlh mawlh zawk turin sorkar thar chu an beisei tih a sawi.