Aizawl: MNF Sr. Vice President Tawnluia chuan enchhin sorkar chu mipuiin an chik dawn a, an thlir uluk dawn tih sawiin, “Kan inenchhin hun a rei dawn lo,” a ti.
Chawlhkar kalta Zirtawpnia Mizo Hnam Run chhung inkhawmah Tawnluia chuan thu sawiin, “Pathian kaihhruainain kan let leh ngei dawn. Tun inthlan result hi kan thatna tur zawka Pathian remruat a ni tih kan pawm,” tiin, ZPM-te an lawmpui thu leh duhsakna an hlan thu a sawi a. MNF MLA 10-te chu constructive opposition an ni dawn tih a sawi.
Tawnluia chuan kumin MLA inthlanpui neih zawh taka an chak lohna chuan thahrui a pe dawn a. Unit level atanga General Headquarters thlengin an insiam tha dawn tih sawiin, “Kan nguai reng dawn lo. Pathianin min hruai zel dawn tih hi kan hrechiang a, kan vote hmuh pawh a tlem lo a, kan tho leh thuai dawn. MNF pianna chu Mizo Nationalism a ni a, kan auhla ber tur a ni reng ang. Tawngtaina nen kan bei zel dawn a ni,” a ti.
MNF sorkar hi hnathawk lo anga an puh chungchang hi a taka hretu chu mipui an nih thu sawiin MNF Sr Vice President chuan, “Covid-in kan hnathawh min tibahlah hle a. Hmasawnna hna kan tum angin kan thawk thei lo. Chutih rualin engmah thawk lo anga min puh duh tlat mai te kha a dik bik lo,” tiin, hmathar lain, hnathawk peih, mi taima leh rinawm thahnem tak an la awm avangin an tho chhuak leh ngei dawn tih a sawi.