BJP Mizoram thupuangtu, K Laldinthara’n Congress leh a sangawi zawnpui INDIA-a tel political party hruaitute chu ei rukna nasa takah inhnamhnawihah puhin mipui chanai nasa takin an tichingpen niin a sawi.
Nimin khan Aizawl Press Club-ah thu thar thehdarhtute kawmin K Laldinthara chuan, INDIA-a tel Congress party hruaituten dik lo taka sum an lak luhte chu man chhuah a nih thu a sawi a. State pathum – Jharkhand, Odisha leh West Bengal-a sumdawnna office hrang hrang, Congress MP Dheeraj Sahu nena inkungkaihna neite chu Income Tax Department-in an dap (raid) a, pawisa fai Rs vaibelchhe 200 zet an man a. Hetiang zat pawisa faiin mansak hi India rama a tam ber tum a nih thu a sawi.
K Laldinthara chuan Jharkhand chhung ringawtah pawh thil fel lo tam tak awmin, MNREGA-ah Rs vaibelchhe 550 te, lungalhthei hralh chhuah dan fel lo nasa tak, Rs vaibelchhe 1,500 zet dan lova laih chhuah phalna pek chungchang te, rural development fund Rs vaibelchhia 1,500 te, ram leina Rs vaibelchhe 3,000 hman dan felhlel te, zu hralh chhuah chungchangah Rs vaibelchhe 1,500 zet fel lo tak te a awm tih a sawi.
Hetiang hi Congress leh a sangawi zawnpui, INDIA-a tel political party-te thil tih dan a nih avangin Mizoram mipuite pawhin eirukna chi hrang hranga heng party hruaitute inhnamhnawih dan hi an hriat ve a tul tih a sawi a. Prime Minister Narendra Modi-a kaihhruaiin India ram pumah BJP kaihhruai NDA hian hneh takin sorkar a siam leh ngei dawn niin, BJP Mizoram thupuangtu chuan a sawi bawk.
K Laldinthara chuan Mizoram state chuan ZPM hruai sorkar thar a nei ta a, chief minister thar, Lalduhoma leh minister te, MLA-te BJP Mizoram chuan an lawmpuiin, an lakah beiseina sang tak an nei tih a sawi a. “Zoram mipuite beisei ang ngeia hmasawnna kawnga min kaihhruai kan beisei a, chutianga hmalakna awmah chuan Mizoram Pradesh BJP chuan theihtawp chhuahpui kan inhuam reng bawk a ni. Hei bakah, central scheme leh programme chi hrang hrangte a nihna tur ang taka mipuiten kan chhawr theih tura hmala turin kan beisei bawk a ni,” a ti.