- Ruata
Kum 2024 kumthar tir lama tlangzarh turin company hrang hrang te chuan an lirthei thar tur te an buatsaih mek.
Kumthar tir lama lirthei thar kan hmuh tura beisei te hi lirthei company lar pali, Maruti Suzuki, Hyundai, Kia leh Mahindra te atangin a ni dawn a. Hyundai chuan an midsize SUV lar leh hmingthang Creta hmel thar chu January Ni 16, 2024-ah hian phochhuah an tum tih an lo tichiang tawh a. Kia pawhin an subcompact SUV lar Sonet chu tunkar hian an phochhuah hmel bawk a, hei hi kumthar tir lamah chuan an hralhchhuah nghal char char beisei a ni bawk.
Maruti Suzuki lam hian an hatchback lar leh chuai thei lo, Swift chu new-generation model an tichhuak dawn bawk a. Hei erawh hi chu company lam atangin a chhuah hun tur sawichian a la awm rih lo a. Chutihrualin industry report atang chuan January emaw February emaw a nih beisei a ni. Mahindra & Mahindra XUV300 subcompact SUV hmel thar tur leh XUV400 electric SUV te pawh hi chiang taka puanzar la ni lo mahse kumthar kum tir lam beisei a ni bawk a ni. Heng lirthei chhuak thar tur te hi tawi te te in han bihchiang ila, a then hi chu kimchang deuh tak pawhin a rawn chhuah dan tur leh a nihphung tura kan beisei te kan lo tarlang tawh bawk a ni.
- Hyundai Creta Facelift
Tarlan tawh angin Hyundai Motor India chuan Creta facelift hi January Ni 16-ah phochhuah hman an tum a. Hyundai chuan Creta hmel hi mawi lehzuala rawn thlak tumin ruahmanna an siam a, beisei danin Hyundai global flagship SUV, Palisade te design a rawn pawl dawn a ni. Danglamna hrang hrang turah hian grille lian tha tak, horizontal metallic slat awm tel, projector LED headlamp, leh LED DRL chi thar te kan hmu ang.
ADAS (Advanced Driver Assistance Systems) kan hmu ang a, fully digital instrument cluster thar hlak bakah 360-degree camera te kan hmu dawn bawk a ni. Creta thar tur hian a khawl lamah chuan Verna-ah te pawh kan hmuh ang 160bhp power pechhuak thei, 1.5L turbo petrol engine, bakah tuna kan hmuh mek 115bhp power pechhuak thei 1.5L petrol and diesel khawl te kan hmu dawn a ni.
- Kia Sonet Facelift
Kia Sonet thar tur hi tunkar December Ni 14-ah hian an phochhuah beisei a ni a, a man hi thla thar January, 2024-ah an puanzar beisei a ni bawk a. Facelift model tam taka kan hmuh angin danglamna liantham tak tak erawh a awm lo ang a hetihrual hian hmelthar erawh a rawn pu dawn a, Seltos thara mi ang LED light bar, C-shaped taillamp leh rear spoiler te kan hmu ang a. A chhunglamah chuan digital instrument cluster leh ADAS technology kan hmuh hmel a. A khawl erawh tuna chhuak mekin a hman ang a rawn la hman chhunzawm hmel a ni.
- New-Gen Maruti Swift
Hei pawh hi kan beisei dan hrang hrang a hmain kan lo thailang tawh a. January emaw February-ah emaw tihchhuah hman beisei niin hei hi chu fourth-generation Swift a nih tawh dawn avangin kawng hrang hrangah a danglamna pawh a len viau beisei a ni a. A chhung design pawh hi Fronx leh Baleno te nen a inzul viau dawn a, India rama chhuakah chuan ADAS a awm loh hmel a. Z Series khawl thar hlak 1.2L, 3-cylinder naturally aspirated petrol engine, a hmaa chhuak aia tui hehlo leh tunlai lehzuain tuna a K-series 1.2L, 4-cylinder khawl hman mek hi a rawn thlak hmel bawk a ni.
- Mahindra Xuv300/Xuv400 Facelifts
Mahindra & Mahindra hian XUV300 subcompact SUV leh XUV400 electric SUV chu January 2024-ah hian a chi thar an tichhuak dawn bawk a. XUV300 facelift hian Aisin atanga lak 6-speed automatic gearbox rawn hmang dawnin 131bhp power pechhuak thei, 1.2L turbo petrol engine bakah, 110bhp power pechhuak thei, 1.2L turbo petrol leh 117bhp power pechhuak thei, 1.5L diesel engines te a nei dawn a. XUV300 facelift panoramic sunroof rawn nei dawnin hei hi sub-compact SUV huanga a hmasa ber tur a ni dawn a. Kawng tam taka tuna kan hmuh mekin a neih ang hi a rawn la tawm dawn bawk a ni.