Spain a hmahruaitu Girona umin Real Madrid in an dinhmun an siamtha a, table mawng a awm Almeria laka an chak danah erawh an vanneihna a langsar.
Pathianni zanah Santiago Bernabeu-ah Real Madrid in an mikhualte lakah hian first half-ah goal hnih an chhuah mai a ni lova. Halftime hma in Almeria goal-ah ‘shot on target’ an nei miah lo.
Almeria tan Largie Ramazani leh Edgar Gonzalez ten minute 9-na leh 43-naah goal an khung a. Real manager Carlo Ancelotti chuan halftime zawhah Brahim Diaz, Fran Garcia leh Joselu te dahlutin inkhel a sawi danglam.
Handball sawizui hlawh atanga Jude Bellingham penalty hmuh chu England midfielder in a khung a. Almeria hian Sergio Arribas goal khung sawihlawh taka pawm loh an nei ve leh bawk.
Vinicius Junior goal khung pawm loh a nih zet hnuah pawm leh a ni bawk a. Bellingham-a’n an goal thumna a khung tur chu offside avanga pawm loh a ni leh bawk a. A tawpah erawh minute 99-naah Dani Carvajal-a’n an chakna goal a khung.
Inkhel dangah champion lai Barcelona in an chetchhiatna kalsan tura ke penin hnehna pawimawh an chang a, 4-2 in Real Betis mualah hnehna an chang.
Estadio Benito Villamarín-ah Barcelona tan Ferran Torres chuan hattrick a siam a, Joao Felix-a’n goal dang a khung.
Real Betis tan midfielder rinrawl leh a team khainungtu ni fo Isco chuan goal hnih a khung ve bawk a ni.
Betis hi tun season-ah an muala an tlawm hmasak ber a ni a. League table laihawlah an awm mek.