Sawrkar hmalakna tur zirtirtu sawn rual

Mizoram Education minister Dr Vanlalthlana chuan zirna tih changtlunna kawngah zirtir ina zirtirtu khuangrual lo lutuk chu semrual anih tur thu a puang a. Zirna lam hmasawnna ngaihven thinte, a bik takin thingtlang lama zirtirtu indaih lo tuartute chuan monister thusawi hi an lawm hle. A taka kalpui ngei theih beiseiin minister hian thlawp a hlawh hle.

Mizoram zirna ina zirtirtu awm rualkhai lo hian kan ram ei leh bar a nghawng nat dan hi a namai lo hle a. Thingtlangah zirtirtu neih mumal lohna school a tam em em a. School chu a hminga awm ve siin fate luhna tlak loh nia ngaiin zirna changtlung zawk khawpui lamah zirlai an luh tam phah em em a. Nei lo chung chunga fate khawpui lama an in dah hi thingtlang lama zirtirtu indaih loh vang ani ber. School zirtirtute hi qualified vek an ni a. An dahna school ah hian an theih tawpin thawk vek se chu kan zirna hi thingtlangah pawh chhe lutuk bik tur niin a lang lo. Khawpui lam pan a tulna a awm lovang a. Mahni khuaah nu leh pa karah hlim takin lehkha an zir thei dawn a ni. Hetianga zirtirru tha an neih chuan hautak em em a khawpuia lehkha inzirtir hi a bo duak thei ngei ang. Chhungkaw economy a nghawng nghal bawk dawn a ni. Sum leh pai tam tak khawpuia in dah nana an hmanral chu a kiam dawn a. Hmasawnna lamah pawh chhungkaw tam tak an pen thei dawn a ni.

Khawpuia lehkha zir hi intihhmuh a tulna a awm lova. Mi state a khawpui leh thingtlang inthlauhna nasa lutuk ang hi kan ramah a ni ve lem lova. Hmasawn leh changkang turin kan khawpui hi pan a tulna a awm lem lo. Thingtlang nun hi a awm hran em em lova. Kan nun dan hi a in ang tlang viau. Incheina, khawsak phungah pawh hian thingtlang lam hi an hniam hran lo. Kan thingtlang zirna siamtha tura sawrkar hi a pen dik phawt chuan kan ram hmasawn rahbi thar ani ngei ang.

Amaherawh chu a thawktute hian an tih tur dik tak hi an ti hreh emaw tih mai tur hian thingtlang lama chhuah hi an hreh em em mai a. Khawpuia awm hi an tum vek emaw tih mai tur hi anni a. Helai tak hi huaisen taka sawrkar hian a kalpui ngam a ngai dawn a ni. Chhuanlam chi hrang hrang siamin khawpui chhuahsan loh an tum leh fur dawn a. Khawng taka order siam a, bawhzui a ngai dawn. Sawrkar pawhin zietirtute lakah hleih nei lova ro a rel a, a tul dan ang zela a kal a ngai dawn bawk. Laina leh thian tha duhsak bik awm lova hma lak a ngai dawn. Mipui pawhin he hmalakna hi thlawp theuh i han tum dawn teh ang u.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427