Aizawl Municipal Corporation (AMC) buatsaihin February 21 atanga 24 chhungin Aizawl Day lawmna vawi hnihna neih leh a ni dawn.
Aizawl Mayor Lalrinenga Sailo leh a thawhpuite chuan nimin khan thuthar thehdarhtute hmaah Aizawl Day lawmna vawihnihna neih dan tur hi an puang a, Aizawl Day lawmna pual hian volleyball hmanga AMC ward tinte inelna te, faina hnatlangpui te, stall & exhibition te, photo exhibition te, costume parade te, carnival leh cosplay show te buatsaih a nih dawn a ni.
AMC hotuten an sawi dawnin, AMC ward tin inelna tur, Mayor’s Cup Volleyball Competion chu February 16 atangin neih tan a ni dawn a, ni 21 atangin Aizawl Day lawmna chu lammualah neih tan a ni ang a, a bul tan nan zing karah kea kal hona (walkathon) neih a ni ang a, hemi ni atang hian stall leh exhibition hawn tan a ni ang a, cosplay, carnival leh bouncing castle-te pawh a awm tel dawn a; February 24-ah faina hnatlangpui neih a ni dawn a, Aizawl mipuite chu mahni chenna in bul theuhte lo tifai tura beisei an ni a, Aizawl Day ni tak, February 25 hi Pathianni a nih avangin a lawmna pui ber chu February 24-ah neih a ni ang a, concert pui tak neih a ni dawn a ni.
Aizawl Day lawmnaah hian Aizawla cheng kum upa ber hnenah chawimawina hlan tur a ni a. Cash award hlan a ni dawn a; February 24-ah hlan a ni dawn a ni.