Mizo zirlai pawl chuan mizoram governor kaltlangin Prime minister hnenah India leh Myanmar inkar ramri hung leh intlawhpawh tawn phalna tih tawpa tum chu an duh loh thu an thlen a. Mizote chu Myanmar leh India ah cheng ve ve in hei hi India sawrkar chuan hriatthiamna neiin ramri a chengte chu duh hun hunah inkalpawh phal kan ni a. Hnam khat kan nihnaa unau inneihnaah, chhiatni thatni ah leh kawng hrang hrangah intlawhpawh tawn reng kan ni a. Tun hnaia he intlawhpawh tawn phalna central sawrkarin tih tawp a tum leh ramri hung a tum hi kan duh lo em em ani an ti a. Ramri hung hian mizote chu a thendarh dawn ani an ti bawk.
India sawrkarin hetia hmarchhaka chengte thenawm ram nena inrina hung a tum ta mai hi a chhan tam tak sawi mahsela hriattiam a har hle. Khawvel ram tin hian ramri an nei vek a. Ram leh ram indo te pawh tam tak an awm thin. Ram leh ram chu indo chang a awm a. Inkawmngeih leh hun a awm a. Chu chu khawvel kalphung pawh a ni. India pawh hian a ramri ah China, myanmar, Pakistan, Bhutan, Bangladesh leh Nepal te a nei a. A thenawm ramte nen inhmuhthiam loh a nei thin. China leh Pakistan nen phei chuan nasa takin an lo indo tawh nghe nghe a ni. Mahse, khawi ram nena ramri mah a hung phui tlat kan hre lova. Ramriah sumdawnna nasa takin an kalpui a. An hlawk pui hle bawk.
India hmarchhak bik hi India hian a en dan a dik lo deuh niin a lang. Hmarchhak hi phai ril lam ai chuan kan hnufual deuh a. Tih changkan kan ngai zawk a. Changkang tur hian puih kan ngai a. Puih pawh min pui viau. Mahse, kan ram leilungin a zir loh avangin hmasawnna hi duh angin a chak thei lova. Vawiin ni thlengin kan la hnufual bik a. Kan hnufual bikna lama a bika min dawmkang tura hma lak lam aia a mihringte hnam anga lo awm ve, ringhlel leh ring ngam lo bik anga kan thenawm ram nena inkar hung a tum hian India sawrkar laipui rilru a pho chhuak a. Indian citizen tak tak anga min en lohzia a tilang chiang em em a ni. Heti taka India hian hmarchhak mipuite a en hrang hi hriatthiam theih ani lova. Ramri buai awm hauh lo hung a han tum hi chuan ram dang mi awpbeh luih tumna hmanrua a kawk a. China leh India inkar hung a awm kan hre lova, Pakistan nena inkar hung a awm lova. Engati bik nge hmarchhak ramri hung a tum tâk le.
India tak tak anga en lova, hetia min thendarh a, min khung beh a tum ta mai hi fahrawn enkawl dan ngei chu a ni. Mahse, hnam te inlungrualna hi bang pin a then hran theih ani ngai lova. Khawvel sawrkar chak ber ber America leh Russia inthurualin German ho an then darh a. Berlin lungbang sang taka an dai dan pawh kha a tawpah chuan a chim ta rum rum anih kha. Mizote pawh hi India hian min then darh hi tum mahse a hlawhtling ngai lovang. Unau thinlung a then hran theih ngai siloh. India in a thil tum hi felna lam aiin buaina chawkchhuaktu ani ngei zawk dawnin a lang.