ZPM thalai President, MLA inthlan zawh taka East Tuipui biala ZPM candidate Dr. C. Lalrammawia’n MLA inthlanah tling zo ta lo mahse, East Tuipui bial hmasawnna tura theihtawp a chhuah zui zel tur thu a sawi.
East Tuipui biala khaw hrang hrang tlawha zin kual mek Dr. C. Lalrammawia chuan MLA inthlan zawh taka ZPM party-in Tuipuiral mipuite duhsakna an dawn te avangin lawmthu a sawi a. MLA inthlanah tling zo ta lo mahse, sawrkar kalphung thar, sawrkar tha duha ZPM party candidate te vote tu te beiseina erawh a thlawn lo nia sawiin, amah pawhin East Tuipui bial hmasawnna tura theihtawp a chhuah zui zel tur thu a sawi a ni.
Dr. C. Lalrammawia “Tuipuiral zirna in hrang hrang tlabal leh thawktu nghet sawn chhuah leh pension an tam avanga zirlai ten harsatna an tawh te chu, ZPM party kaihhruai sawrkar hnuaiah sutkian a nih theihna turin theihtawp kan chhuah ang” a ti a. “Sikul zirtirtu pawh unit kaltlang ni lovin, dik takin lak an ni dawn” a ti.
Bungzung, Vangchhia leh Khankawn-ah VC house tha tak sak a nih tur thu pawh ZPM thalai President Dr. C. Lalrammawia chuan a sawi a. Sawrkar tharah chuan politics chhia avanga phuara lo awm thin ten a mual an kil ve tawh dawn niin a sawi bawk a ni.