Aizawl: Sports & Youth Services department changtu Minister Lalnghinglova Hmar chuan zirlaite chu zing tho hma a, taima turin a chah.
Nimina Govt Aizawl West College-in Vana pa Hall-a Annual College Week kharna hun an buatsaih hmanpuitu Minister Lalnghinglova Hmar chuan, Mizoram standard time hi thenawm ramte aiin darkar khatin a tlai sa a. Mi tam tak zing kara hna tam tak thawk hman an awmlaia mut nana hun hman zel chuan inenlet a ngai takzet a ni tiin, zirlaite chu zing tho hma a, taima turin a chah.
Lalnghinglova Hmar chuan thingtlang lam atanga Aizawla lehkha zira awm mekte pawh nu leh pa te’n lehkha zir tura min tih ang ngeiin Aizawl-a awm ringawt duhtawk lo va, thiamna tak tak zir chhuak tura chah bawk.
Zirlaite chu an zirlai bakah Mizoram history, geography leh politics te hriat ve zel tum tura chahin, tawng chi hrang hrang, a bik takin English, Hindi leh Japanese tawngte eizawn theihna tur khawpa thiam tum tur leh an family background avanga chhuanlam siam lo tura chahin, thawhrimna hmanga an thiamna te tihmasawn zel turin a chah bawk a ni.
Govt. Aizawl West College-ah hian College Student 927 awm mekin, Teaching Staff 33 leh non teaching staff pakua an awm mek bawk.