Aizawl: Revenue Minister B Lalchhanzova’n Assam Rifles ram chhuahsan tura mi mal ram nei, la surrender lote chu a mal mala kawma harsatna chin fel dan zawnpui an duh thu a sawi.
Ningania Land Revenue & Settlement Department in inhlan tharna hun a hmanpuinaah thu sawiin Minister B Lalchhanzova chuan Assam Rifle ram chhuahsan tura mi mal ram nei, surrender tawhte chu fakin, lawmthu sawina lehkha ziak pek vek an tum thu a sawi a. Hetih rual hian la surrender lote pawh a mal mala kawm harsatna chinfel dan zawnpui an duh thu a sawi.
Minister kaltlang khera house pass dilna lak a ngai thin chu mipui tana harsatna a thlen tam zawk a ni tih an hriat avangin titawpin, director kuta a hlan thu B Lalchhanzova hian a sawi a. Surveyor indaih lohna phuhru turin survey hna outsource-na tur pawh peih fel tawh a nih thu sawiin, EOI tihchhuah mai theih a ni tawh tih minister hian a sawi bawk.
B Lalchhanzova chuan, “Property registration leh thil tul danga hman turin E-stamping rules pawh duan mek a ni a. Hei hian mipui tan awlsamna a thlen bakah stamping atanga sorkar sum lak luh pawh a pui hle dawn a ni,” a ti.
ZPM sorkar chuan langtlang tak leh khairual takin hna a kalpui tur thu sawiin revenue minister chuan department-a thawk mi tha tam tak kara mi rinawmlo leh pamham lo awm ve thin ten department hmai an ti bal thin chu pawi a tih thu a sawi a. Tun hnuah chuan heng ang hi awm tawhlo se a duh thu a sawi a. Thawktute chu department hmasawnna kawng leh mipui rawng tha zawka an bawl theih nana theihtawp chhuah puiah sawmin, hemi kawngah a puihna an mawmawhna apiangah a in hawn reng thu leh an biak phak loh emaw, an hlauh tur ni lovin thil tha an tihpui tur Minister nih a tum thu a sawi bawk.