Thla tluana dawr hawng tura sorkar thupek zawm duh lo retailer an awm thu supply department-in report an dawng a, sorkar thu zawm duh lote chu an mawhphurhna pawh hlihsak an ni mai thei.
Food, Civil Supplies & Consumer Director Zodingpuii chuan January 5, 2024 khan thupek tichhuakin, “Supply department retailer zawng zawngten thla tluanin an dawr an hawng ngei tur a ni,” tih a tar lang.
He thupek zawm lo an awm leh awm loh zawhna chhangin Supply Minister B. Lalchhanzova chuan thu pek zawm lo report an dawn thu sawiin, “Report kan dawn tawh chin chu a changtu District Civil Supply Officer hnenah bawhzui turin kan hrilh a, district hrang hranga supply department officer-te pawh hemi chungchang lo en zui leh vil reng turin kan chah,” a ti.
Supply minister chuan retailer zingah sawisel kai an awm chuan department-in an bawhzui zel tih a sawi a, “Harsatna nei bik riau an awm a nih chuan an harsatna sut kianpui dan kan ngaihtuahpui thin,” tiin a sawi.
Thupek zawm lote chunga hma an lak dan tur zawhna chhangin Chhanzova chuan, sorkar thu chhuak zawm tumna nei lo hrim hrim an awm a nih chuan an mawhphurhna pawh an hlihsak a tul mai thei tih a sawi a; thupek zawm duh lote chungchang pawh uluk taka an ngaihtuah tur thu a sawi.
Thla tluana retailer-te inhawng tura tih an nih chhan chu mipuiten sum leh paia harsatna an neih pawha hun tiam chhunga an quata an lak theihna tura ruahman a ni a, hetihlai hian ration buhfai sem tur an sem zawh tawh erawh chuan thla tluana hawn reng pawh a ngai kher lo ang tih supply minister chuan a sawi a ni.
Supply department-in ration lak hun tura a ruahman chu zing lamah dar 6:30 atanga dar 8:30 inkar leh tlai lamah dar 3:30 atanga dar 5:30 inkar a ni a, hetihlai hian hun bi tiam chhunga la thei lo an awm palh pawhin department hnena hriattirna tur ruahmanna a awm chho leh mek tih Chhanzova chuan a sawi bawk a ni.