aIZAWL: Mizo Student’s Union (MSU) chuan nimin khan Mizoram University (MZU) chhunga Meitei Community te chet dan chungchanga lungawi lohna ziakin Mizoram University Registrar hnenah lehkha an theh lut a, a copy hi Dean Students’ Welfare leh MZUSC te hnenah an pe bawk.
MSU chuan hun rei tak ata tawh Mizorama hnam dang zirlai awmte himna turin theihtawp a lo chhuah tawh thin thu sawiin, “Manipur buaina avanga hlauhlawpa Meitei zirlaite an tlan chhiat lai pawhin a hnemtuah tang hram hramin kan unaute laka an chet duh dan avanga thinrim taka kan awm lai pawhin state ralmuang ber kan nihna chhawm nung turin kan insum hram hram thin,” an ti.
Tun hnaiah MZU-a Meitei zirlaite’n Zo hnahthlak unaute tihchimihna tur hmanraw lei nan a sum an lo khawn tih sawiin MSU chuan, “Ralmuang taka kan dah laia hnung lam atanga min vit let hi MSU chuan a ngai thiam lo tak zet a. MSU hi zirlai pawl a nih angin kan ram leh hnam chhan nan chuan a tawp a thleng zel thin a. Tuna kan zirlaipui ngeiin kan unaute chimihna tur atan tha a thawh chungchangah hian MSU chuan tui aiin thisen buk a rit zawk tih hre turin Mizo zirlaite a chah nawn a ni,” tiin, he thil thleng hi MSU chuan a en liam mai mai dawn loh thu zirlaite an chah bawk.